د موصل د ښار ستر عملیات پیل شول

د عراق  د موصل د ښار چې د تیرو دوو کلونو راهیسې د داعش  تر کنټرول لاندې  دی  د ژغورنې  ستر عملیات  پیل شول.

د عملیاتو د پيلیدو  خبر  د عراق لومړي وزیر حیدر العبادي  د دولتي تلویزیون  له لارې پخپله  ورکړ.

د ویلو ده چې  د موصل  ښار د ژغورولو پدې سترو عملیاتو کې  د عراق د مرکزي  حکومت د پوځ  سربیره  د عراق په شمال کې د سیمه ایزې ادارې  ځواکونو پيشمرګه هم ګډون کړی دی .

عراقي او پيشمرګه  ځواکونو  په موصل ښار  د دریو لورو نه  بریدونه پيل کړي دي.

پدې عملیاتو کې  د ۱۵ نه تر ۱۸ زرو  تنو پورې یواځې پيشمرګه ځواکونو ګډون کړی دی .

د موصل ښار  په ۴۰ کیلومترۍ کې  میشتو عراقي  او پيشمرګه ځواکونو  په نوموړي ښار کې د داعش په مرکزونو  لومړی  د توپخانې  بریدونه پیل کړل.

د عراق لومړي وزیر حیدر العبادي  تیره شپه  په دولتي تلویزیون کې  د وینا  په ترڅ کې وویل چې  «  د موصل ښار د عملیاتو په ترڅ کې به  د ښار د نیولو په صورت کې  یواځې  د اردو ځواکونه  او پولیس  ښار ته  ننوځي. »

هغه د موصل د خلکو نه  د عملیاتو پر مهال  د عراقي ځواکونو سره د همکارۍ غوښتنه وکړه.

العبادي وویل چې دا عملیات  د نړۍوالو ایتلافي ځواکونو د هوايي ملاتړ سره  پیل شوي دي. العبادي وویل چې  د عملیاتو په لړ کې په پام کې ده چې  لومړی  د موصل ښار د حمدانیه  ولسوالۍ  چې  ډیری پکې مسیحیان  میشت  دي  وژغورل شي.

د بله پلوه  د عراق لپاره د امریکا په مشرۍ د نړۍوال ایتلاف  استازي  بریت مک ګورک  د ټویټر له لارې  ویلي دي چې  د داعش پر خلاف  پدې عظیمو عملیاتو کې  د عراقي ځواکونو سره  د همکارۍ  د ګډون له امله  افتخار کوي.