په یمن کې القاعدې ترهګرې ډلې ته ستر ګوزار

د سعودي عربستان رسمي خبري اژانس  په یمن کې د سعودي عربستان په مشرۍ د ایتلافي ځواکونو له قوله ویلي دي چې د ایتلافي ځواکونو په عملیاتو کې د یمن په سویل کې  څه باندې ۸۰۰ تنه د القاعدې جنګیالي وژلي دي. په خبر کې راغلي دي چې پدې کسانو کې د القاعدې جګپوړي چارواکي هم شتون لري.

د بله پلوه د رویټرز خبري اژانس هم  په سیمه کې د عینې شاهدانو له قوله لیکلي دي په یمن کې د عبدالرب منصور هادي  ځواکونو د سعودي په مشرۍ د ایتلافي ځواکونو په ملاتړ  د مکلا ښار  د القاعدې د ځواکونو نه نیولی دی.

د ویلو ده چې  د القاعدې جنګیالیو نږدې  یو کال  مخکې  د یمن په سویل کې د مکلا په ښار برید وکړ  او ښار يي ونیو. دا ښار چې څه باندې  ۲۰۰ زره تنه نفوس لري د عرب سمندر په ځنډه کې  موقعیت لري.

د ویلو ده چې  یمن  په سیمه کې  د ترهګرو ډلو د مرکز په توګه یادیږي. په یمن کې د القاعدې سربیره د داعش ترهګره ډله  او حوثي یاغیان  قوي فعالیت لري.

په یمن کې  د پخواني ولسمشر عبدالرب منصور ځواکونه  د سعودي عربستان د ملاتړ  نه  او حوثي یاغیان  د ایران د ملاتړ نه برښمند  دي.

حوثیانو د عبدالرب منصور  سره  په کویټ کې  د سولې په مذاکراتو پیل کړی دی.

همداشان د ملګروملتونو سازمان ویلي دي چې په یمن کې د لومړي ځل لپاره د سولې لپاره  یو ښه فرصت رامنځته شوی دی.

په یمن کې د لومړي ځل لپاره  د تیر کال  د دسمبر په میاشت کې  د سولې خبري اترې شوې وې چې د کومو پایلو پرته پایته رسیدلې وې. پدې مذاکراتو کې دواړه خواوې یواځې په ۶ ورځې اوربند په تفاهم رسیدلي وو.

د یادولو وړ ده چې  په یمن کې حوثي یاغیان او د پخواني ولسمشر علي عبدالله صالح پلوي ځواکونو  د هیواد په یو زیات شمیر برخو حاکمیت لري. د یمن پلازمنیه  صنعا  او یو زیات شمیر سیمې ددوی تر کنټرول لاندې دي. همداشان  د هیواد  یو شمیر سیمې بیا د عبدالرب منصور هادي د ځواکونو په لاس کې دي.

په یمن کې  د القاعدې ترهګرې ډلې سربیره  داعش ډله هم  فعالیت لري.