د ایران ولسمشر یو ځل بیا د زنګیزور د دهلیز سره خپل سخت مخالفت وښود

د ایران ولسمشر ابراهیم رئیسي وویل چې د زنګیزور دهلیز چې آذربایجان به له نخچیوان سره وصل کړي "د دوی ملي امنیت ته ګواښ دی".

ولسمشر رئیسي په پلازمینه تهران کې د اذربایجان د ولسمشر الهام علی یف له ځانګړي استازي حلف حلفوف او د ارمنستان د ملي امنیت د شورا له منشي ارمین ګریګوریان سره جلا جلا کتنې وکړې.

په سیاسي چارو کې د ایران د ولسمشرۍ د دفتر مرستیال محمد جمشیدي د نوموړې لیدنې په اړه ویلي‌ دي‌ چې  رئیسي د ارمنستان د ملي امنیت شورا له منشي او د اذربایجان د ولسمشر ځانګړي استازي سره په خپلو کتنو کې، ویلي‌ دي‌ چې "زنګیزور دهلیز به په سیمه کې د ناټو د شتون اساس وي او د هیوادونو ملي امنیت ته ګواښ رامینځته کړي." هغه ټینګار وکړ چې ایران په کلکه  د نوموړې دهلیز مخالف دی.