په پاکستان کې اورلګیدنې ۹ تنه ووژل

د پاکستان د سند ایالت په یوه کلي کې د اور لګېدنې له امله د ۸ ماشومانو په ګډون ۹ تنو خپل ژوند له لاسه ورکړی او ۵۰ کورونه سوځېدلي دي.

د پاکستاني  رسنیو د راپورونو له مخې، دا پیښه د سند ایالت د دواب ولسوالۍ په کلي کې د یو کور په پخلنځي کې د اورلګیدنې له امله رامنځته شوې ده.

د لومړنیو معلوماتو له مخې د اور لګېدنې له امله د ۸ ماشومانو په ګډون ۹ تنو خپل ژوند له لاسه ورکړی او ۵۰ کورونه له ګټې اخیستو وتلي دي.

د کلیو اوسیدونکو ویلي، چې په دې اور کې ۱۶۰ څاروي له منځه تللي او کرنیزو ځمکو ته هم زیان اوښتی دی.

د کلي اوسېدونکي وايي، چارواکو ته يې زنګ وواهه، خو اور وژونکي سيمې ته نه دي رسېدلي.

د پاکستان لومړي وزیر شهباز شريف په دې اړه د مکمل رپورټ جوړولو غوښتنه کړې او ويلي دي چې د کلي زیانمن شوو خلکو سره به مرستې وشي.