عمران خان د ایران د دیني رهبر سره ولیدل

د ایران د دیني مشر د دفتر لخوا د خپور شوي بیان له مخې  د ایران دیني مشر د پاکستان د لومړي وزیر عمران خان سره  چې د رسمي سفر په ترڅ کې ایران ته راغلی دی  د ولسمشر حسن روحاني  په ګډون  لیدنه وکړه.

پدې لیدنه کې د سیمې  د مهمو پرمخګتونو په اړه  خبرې وشوې.

خامنه يي پدې لیدنه کې د یمن د جګړې په اړه ویلي دي چې « ایران ډیر وخته  د یمن د جګړې د پایته رسولو په خاطر  یو ۴ ماده ایز پلان  ټولو ته وړاندې کړی وو. »

هغه ویلي دي که چیرې په یمن کې روانه جګړه په سالم  شکل  سره  پایته ورسیږي  دا به په سیمې ډیرې مثبتې اغیزې وکړي.

د ایران دیني رهبر ویلي دي چې د سیمې د هیوادونو او خلکو پر وړاندې هیڅډول دښمني  او کینه نلري  بلکې  هغوې  د امریکا  د غوښتنې له مخې زمونږ سره دښمني  او کینې کوي. هغوې زمونږ پر خلاف خصمانه فعالیتونه کوي.

د ایران دیني رهبر ددې خبرې په ټینګار ویلي دي چې « ایران به هیڅکله هم  د جګړې پیلوونکی  طرف  نشي  او که چیرې څوک د ایران پر خلاف د جګړې اعلان کوي  هغه به پرته د شکه چې پخپل دې عمل پښیمانه کړي.»

د ویلو ده چې د پاکستان لومړی وزیر عمران خان د ایران او سعودي عربستان ترمنځه د موجودو ستونزو د حل په خاطر  د منځګړي په توګه  ایران ته راغلی دی. هغه به د روانۍ اونۍ په دننه کې  د سعودي عربستان پلازمینه ریاض هم  سفر وکړي.

د ویلو ده چې  د پاکستان لومړي وزیر عمران خان تیره میاشت په نیویارک کې  د ملګروملتونو د عمومۍ اسمبلۍ  په چوکاټ کې د امریکا د ولسمشر ټرمپ سره په لیدنه کې ویلي وو چې د هغه نه  د ایران او سعودي عربستان ترمنځه د منځګړتوب غوښتنه شوې ده .

هغه امریکا ته د سفر نه مخکې د سعودي عربستان د ولیعهد شهزاده محمد بن سلمان او په نیویارک کې بیا  د ایران د ولسمشر حسن روحاني سره  لیدنه کړې وه.

د ایران د بهرنیو چارو وزیر محمد جواد ظریف د ترکیې د ملي راډیو تلویزیون سره  په ځانګړې مرکه کې  ویلي وو چې  د سعودي عربستان سره  د منځګړي په واسطه  او حتا مخامخ هم  هر ډول  تماس ته  چمتو  دي.