د پاکستان  د خیبرپښتونخوا ایالت د دیرې اسماعیل خان په سیمه کې پر پولیسو خونړی برید شوی دی.

د سیمه ایزو رسنیو د خبر له مخې  د دیرې اسماعیل خان  د پروا ټهانې  په مربوطاتو کې  د نامعلومو وسله والو کسانو لخوا د پولیسو پر موټر  خونړی برید وشو.

پدې پیښه کې  ۴ تنو پولیسو ژوند د لاسه ورکړی دی.

ویل کیږي  په برید کې  د موټر چلوونکی  ځای په ځای ژوند د لاسه ورکړی وو او د پولیسو افسر په ګډون  درې تنه نور ټپيان شوي وو.

ټپیان  سمدلاسه  روغتون ته انتقال  شول  چې په روغتون کې ساه ورکړه.

د سیمې پولیسو خبري رسنیو ته ویلي دي چې  برید د دوو تنو موټرسایکل سپرو لخوا شوی دی. ویل کیږي  برید کوونکي  پداسې چټکۍ سره  دا برید کړی  چې  پولیسو د ځوابي  ډزو  فرصت هم  ندی موندلی.

برید کوونکي د برید نه وروسته د پيښې د ځای نه په تیښته بریالي شوي دي.

د برید کوونکو د نیولو په خاطر په سیمه کې پراخه  د پلتنې عملیات پیل شوي دي.

د برید په اړه تحقیقات پيل شوي دي.