طالبانو امریکا متحده ایالتونو ته د کډوالۍ د سترې احتمالي څپې د پیلیدو په اړه خبرداری ورکړ.

د طالبانو د بهرنیو چارو وزارت سرپرست امیر خان متقي د امریکا کانګرس ته یو سرخلاصی لیک استولی دی. متقي پدې لیک کې ددې خبرې په ټینګار لیکلي دي چې د امریکا لخوا د افغانستان د شتمنیو کنګلول د ستونزو حل بلکې د ستونزو زیږونکی یو اقدام دی.

هغه ویلي دي چې د امریکا دا اقدام او پریکړه د دوحې د تړون نه په ښکاره توګه سرغړونه ده.

متقي ویلي دي د افغانستان خلک چې د اوږدو کلوو جګړې نه وروسته د لومړي ځل لپاره واقعي سولې او امنیت ته رسیدلي دي اوس د امریکا لخوا د افغانستان د شتمنیو د کنګلولو سره د اقتصادي ستونزو سره مخامخ شوي دي.

هغه د امریکا نه هر څه ژر د افغانستان د کنګل کړو شتمنیو د خلاصولو غوښتنه کړې او خبرداری ورکړی چې د نه خلاصولو په صورت کې کیدای شي چې د افغانستان خلک او حکومت د یو ستر بحران سره مخامخ شي.

هغه خبرداری ورکړی که چیرې د افغانستان وضعیت په همدې ډول دوام وکړي کیدای شي چې د هیواد نه د کډوالۍ سترې څپې پيل شی چې دا به په سیمه او نړۍ کې د جدي انساني او اقتصادي بحران لامل وګرځي.

مقتي ویلي دي چې د افغانستان اړوند د شتمنیو کنګلولو په هیواد کې روغتیا نه نیولې تر پوهنې ټول عامه خدماتو سکتورونه د جدي ګواښونو سره مخامخ کړي دي. پر ټولو عامه خدماتو يي ډیر منفي اغیزه کړې ده .

افغانان يي د جدي ستونزو سره لاس او ګریوان کړي دي.

متقي پر امریکا د افغانستان د روانو ستونزو د حل په برخه کې د هر څه ژر ګامونو د اوچتولو غږ کړی دی. هغه د امریکا نه د افغانستان د ټولو شتمنیو د خلاصونو او پر بانکي حسابونو لګول شوو بلاکونو د لرې کولو غوښتنه کړې ده .