په زابل کې پر پولیسو د موټر بم برید شوی
د زابل د شاجوې په ولسوالۍ کې د پولیسو پر مرکز ډله ایز برید شوی دی
د افغانستان د زابل په ولایت کې پر پولیسو د موټر بم برید شوی دی.
د زابل ولایت د امنیې قومندان حکمت الله کوچي خبري رسنیو ته ویلي دي چې طالبانو تیره شپه په شاجوې په ولسوالۍ کې د پولیسو پر مرکز ډله ایز برید کړی چې نښتې اوس هم دوام لري.
هغه وویل چې طالبانو د سهار په ساعتونو کې بیا د پولیسو پر مرکز د موټر بم برید هم کړی چې په نتیجه کې ۶ تنه پولیس ټپیان شوي دي.
هغه ویلي دي چې دا برید د شاجوی ولسوالۍ د نورک په سیمه کې شوی دی. هغه ویلي دي چې برید د پولیسو مرکز ته د پام وړ زیانونه هم اړولي دي.
د بله پلوه د افغانستان د میدان وردګ په ولایت کې بیا پر امنیتي ځواکونو د موټر بم برید مخنیوی شوی دی.
د میدان وردګ ولایت ځايي مقاماتو ویلي دي چې نن د سهار د ۴ بجو په شاوخوا کې طالبانو غوښتل چې د امنیتي ځواکونو پر مرکز د موټر بم برید وکړي چې هدف ته د رسیدو نه مخکې د امنیتي ځواکونو لخوا له منځه یوړل شو.
د موټر بم د چاودنې نه وروسته یوې ډلې برید کوونکو پر امنیتي مرکز برید وکړ چې په نتیجه کې نښته پیل شوه.
په نښته کې ۱۵ تنو طالبانو ته د مرګ ژوبلې د اړولو ادعاء شوې ده . ویل کیږي پدې نښته کې ۸ تنه طالبان مړه او ۷ تنه ټپیان شوي دي.
همداشان په چاودنه او نښته کې د ۴ تنو امنیتي ځواکونو د ټپي کیدو نه هم خبر ورکړ شوی دی.
اړوند خبرونه
په افغانستان کې په تیرو دریو ورځو کې د سیلابونو له امله ۳۳ تنو خپل ژوند له لاسه ورکړی دی.
په افغانستان کې په وروستیو سیلابونو کې په لسګونو تنو ژوند د لاسه ورکړی