په هلمند کې پر افغان ځواکونو هوايي برید شوی
د افغانستان د هلمند په ولایت کې د غوڅ ملاتړ په اشتباهي برید کې ۱۷ تنه امنیتي ځواکونو ژوند د لاسه ورکړی دی.
د هلمند ولایت د ولایتي شورا رئیس ویلي دي چې غوڅ ملاتړ تیره شپه د نهرسراج په ولسوالۍ کې په افغان امنیتي ځواکونو چې د طالبانو سره په جګړه کې بوخت ول اشتباهي هوايي برید کړی دی چې په پایله کې ۱۷تنو ژوند دلاسه ورکړی او ګن شمیر نور ټپيان شوي دي.
د هلمند ولایت د ولایتي شورا رئیس عطاالله افغان خبري رسنیو ته ویلي دي چې پدې هوايي برید کې ۱۴ تنه افغان سرتیري ټپیان شوي دي.
همداشان د هلمند ولایت د والي ویاند عمر ځواک هم د پیښې پخلی کړی دی او ویلي دي چې برید د ناټو د غوڅ ماموریت لخوا شوی دی.
ځواک خبري رسنیو ته ویلي دي چې تیره شپه په ۸ بجو طالبانو په نهرسراج کې د پولیسو په یو مرکز برید وکړ . کله چې تازه دمي ځواکونه سیمې ته روان ول د طالبانو د کمین سره مخامخ شول او نښته پیل شوه.
همداشان د نوموړې جګړې پر مهال بیا هوايي برید هم شوی دی چې په پایله کې ګن شمیر افغان ځواکونو ته مرګ ژوبله اوښتې ده .
ناټو ځواکونو د نوموړي برید په اړه تر اوسه پورې څه ندي ویلي . د والي ویاند بیا ویلي دي چې د پیښې د څیړولو په خاطر یو نظامي پلاوی په دنده ګمارل شوی دی .
د هلمند والي محمد یاسین هم ویلي دي چې د پیښې په اړه تحقیقات پیل شوي دي.
دا لومړی ځل ندی چې ناټو په افغانستان کې پر افغان ځواکونو اشتباهي برید کوي.
اړوند خبرونه
په افغانستان کې په تیرو دریو ورځو کې د سیلابونو له امله ۳۳ تنو خپل ژوند له لاسه ورکړی دی.
په افغانستان کې په وروستیو سیلابونو کې په لسګونو تنو ژوند د لاسه ورکړی