ولسي جرګې د دوو نورو وزیرانو صلاحیتونه هم سلب کړل.

په افغانستان کې د ولسي جرګې لخوا د کابینې د وزیرانو استیضاح روانه ده. په ننۍ غونډه کې د مالیې وزیر محمد اکلیل حکیمی، د ترانسپورټ وزیر محمد الله بتاش او د معارف وزیر محمد حنیف بلخي ولسي جرګې ته غوښتل شوي ول چې یو یې هم هلته  حاضر نشو. د وکیلانو د یو ساعته مهلت د پای ته رسېدلو  نه وروسته د اعتماد د رایې د سلبولو په موخه رایه اچونه  وشوه چې د مالیې د وزیر پرته د درې نورو وزیرانو صلاحیت سلب شو.

پدې ډول د معارف وزیر محمد حنیف بلخي د ۲۰۴ رایو نه یواځې ۶۸ مثبې رایې ترلاسه کړلې او ویې نشو کولا چې د ۱۱۸ رایو نصاب پوره کړي.

د ترانسپورټ وزیر محمد الله بتاش هم د ۱۴۲ منفی او ۵۱ مثبو رایو په ترلاسه کولو سره ونشو کولای چې د اعتماد رایه ترلاسه کړي.

یواځې د مالیې وزیر محمد اکلیل حکیمی پدې بریالی شو چې د اعتماد رایه ترلاسه کړي.

دا په داسې حال کې ده چې پرون د بهرنیو چارو وزیر صلاح الدین رباني، د ټولګټو چارو وزیر محمود بلیغ او د کار او ټولنیزو چارو وزیرې نسرین اوریاخېل هم ونشو کولای چې د پارلمان رایه  ترلاسه کړي.