په بغلان کې د ماین په چاودنه کې یوه کورنۍ له منځه ولاړه
د افغانستان په شمال کې په بغلان ولایت کې د ملکي وګړو د سپرلۍ په موټر د ماین د چاودنې له امله د یوې کورنۍ ۱۱ تنه ووژل شول
د افغانستان په شمال کې په بغلان ولایت کې د ماین په چاودنه کې د یوې کورنۍ ۱۱ تنو غړیو ژوند د لاسه ورکړ.
د بغلان ولایت امنیتي سرچینو ویلي دي چې د قیصر خیلو په سیمه کې د ملکي وګړو په موټر چاودنه وشوه.
د بغلان ولایت د امنیتي سرچینو د خبر له مخې پیښه پرون د جمعې په ورځ رامنځته شوه.
ویل کیږي د ملکي وګړو د سپرلۍ موټر په لاره کې په ځای په ځای شوي ماین وخوت او چاودنه رامنځته شوه. په پیښه کې د یوې کورنۍ ۱۱ تنه غړي چې پنځه تنه يي ماشومان او ۲ تنه يي ښځې دي وژل شوي او درې تنه هم ټپیان دي.
امنیتي سرچینو د پیښې پړه په طالبانو اچولې ده او ویلي دي چې طالبانو څو ورځې د مخه د سیمه ایزو پاڅون کوونکو په قرارګاه د برید نه وروسته سیمې نیولې وه چې کیدای شي په همدې موده کې په سیمه کې ماینونه ځای په ځای کړي وي.
طالبانو بیا په سیمه کې د ماینونو د خښولو او د نوموړې چاودنې په اړ څه ندي ویلي.