ИКУ менен Араб Лигасынын Газа боюнча сүйлөшүү тобунун жыйыны

Түркия "аймактын туруктуулугуна жана эл аралык тартипке коркунуч келтирген" Израилдин кол салууларын токтотуу жана чыңалууну азайтуу үчүн эл аралык коомчулуктун тез арада чара көрүшү керектигин билдирди.

Тышкы иштер министрлиги, Иорданиянын борбору Амманда өткөн Ислам Кызматташтык Уюму (ИКУ) менен Араб Биримдигинин Газа боюнча сүйлөшүү тобунун жыйыны тууралуу жазуу түрүндөгү билдирүү жасады.

Билдирүүдө Тышкы иштер министри Хакан Фидандын ИКУ жана Араб Биримдигинин Газа боюнча сүйлөшүү тобуна мүчө кесиптештери менен Амманда жолуккандыгы белгиленип, Газа боюнча сүйлөшүү тобунун Иорданиянын падышасы 2-Абдулла тарабынан кабыл алгандыгы айтылды.

Жыйында Израилдин Газадагы геноцидин токтотуу аракеттери, ок атышпоо сүйлөшүүлөрү жана Газага гуманитардык жардам жеткирүү, ошондой эле Батыш Шериада күчөгөн оккупация, Аль-Акса мечитине жана Кудстун тарыхый статус-квосуна каршы провокациялардын талкууланганы кабарланган билдирүүдө: «Газада уланып жаткан геноцид менен катар Батыш Шериада палестиналыктарды бутага алган отурукташуучулардын зомбулугу жана Израиль армиясынын кол салуулары тынчсыздандыраарлык деңгээлге жетти. Аймагыбыздын туруктуулугуна жана эл аралык тартипке коркунуч келтирген Израилдин кол салууларын токтотуу жана чыңалууну азайтуу үчүн эл аралык коомчулук тез арада чара көрүшү керек»,-делди.

Билдирүүдө ИКУ жана Араб Биримдигинин Газа боюнча сүйлөшүү тобунун, Палестинада туруктуу тынчтыкты орнотуу үчүн эки мамлекеттүү чечимди тез арада ишке ашыруу менен бул процесстин биринчи этабында Палестинанын көбүрөөк өлкө тарабынан таанылышы жана Бириккен Улуттар Уюмуна толук мүчөлүк үчүн иш-аракеттерин улантаары маалымдалды.