Фидан эртең Өзбекстанга барат

Тышкы иштер министри Хакан Фидан ички иштер министри Али Йерликая жана Улуттук чалгындоо уюмунун (MİT) башчысы Ибрахим Калын менен эртең Өзбекстанга барат.

Дипломатиялык булактардан алынган маалыматка караганда Фидан, Йерликая жана Калындын Өзбекстанга сапарында биринчи жолу «үч тараптуу жыйын форматында» кеңешмелер өткөрүлөт.

Жолугушууларда эки тараптуу саясий жана экономикалык карым-катнаштар менен коопсуздук жаатындагы кызматташтыкка баа берилет.

Жыйындан тышкары Түркия менен Өзбекстандын ортосундагы институционалдык тармактагы карым-катнаштарды дагы да күчтөндүрүүгө багытталган иш-аракеттерди жыйынтыктоо максатталууда.

Министр Фидандын сапарынын алкагында өзбек кесиптеши Бахтияр Саидов менен жолугушуусу пландалууда.

Жолугушууда июнь айында Түркияда өткөрүлгөн Түркия-Өзбекстан Жогорку деңгээлдеги стратегиялык кызматташтык кеңешинин (YDSK) үчүнчү отурумунда кабыл алынган чечимдер да каралат.

Ушул алкакта экономика, коргоо өнөр жайы, энергетика, транспорт, маданият, билим берүү, мыйзамсыз миграция, терроризм менен күрөшүү жана коопсуздук тармактарындагы карым-катнаштардын талкууланышы күтүлүп жатат.

Сапардын алкагында Түрк мамлекеттери уюму (ТМУ) баш болгон аймактык темалар, ошондой эле аймактык жана эл аралык уюмдардын карамагындагы кызматташтык ар тараптуу бааланат.

Фидандын Өзбекстанда президент Шавкат Мирзиёев тарабынан кабыл алынышы да күтүлүүдө.