Түркия Айшенур Эзги Эйгинин сөөгүн үй-бүлөсүнө жеткирүү жана жерге берүү аракеттерин улантууда

Түркия басып алынган Батыш Шериада израилдик аскерлер тарабынан шейит кылынган Айшенур Эзги Эйгинин сөөгүн үй-бүлөсүнө жеткирүү жана жерге берүү аракеттерин улантууда.

Тышкы иштер министрлигинин басма сөз катчысы Өнжү Кечели, өзүнүн X эсебиндеги билдирүүсүндө: «Батыш шериада Израиль аскерлери тарабынан шейит кылынган жараныбыз Айшенур Эзги Эйгинин сөөгүн үй-бүлөсүнө жеткирүү жана жерге берүү үчүн керектүү иштерди улантуудабыз»,-деди.

Эйгинин Америка Кошмо Штаттарында (АКШ) жашаган үй-бүлө мүчөлөрү жана Түркиядагы туугандары менен байланышта болгондорун белгилеген Кечели, палестиналык бийликтер тарабынан соттук экспертизанын корутундусунун Түркиянын Кудстагы башкы консулдугуна жөнөтүлүшү күтүлүп жатканын айтты.

Кечели : «Кийинки процессте жараныбыздын сөөгүнүн алгач Израилге алып келиниши, андан соң Иордания аркылуу өлкөбүзгө жеткирилиши каралууда»,-деди.

АКШ жарандыгын алган түрк активист Айшенур Эзги Эйги 6-сентябрда басып алынган Батыш Шериадагы Наблус шаарында өткөрүлгөн тынчтык демонстрацияларына катышкан жана израилдик аскерлер тарабынан атылган октун натыйжасында башына ок тийип каза болгон.