Уралоглу Шарфа менен эки тараптуу карым-катнаштарды талкуулады

Транспорт жана инфраструктура министри Абдулкадир Уралоглу Алжирдин транспорт министри Юсуф Шарфа менен эки өлкөнүн ортосундагы кызматташтык мүмкүнчүлүктөрүн талкуулады.

Министр Уралоглу жана аны коштогон делегация борбор шаар Алжирдин транспорт министри Шарфа менен Алжирде жолугушту.

Түркия-Алжир карым-катнаштарынын акыркы жылдарда стратегиялык өнөктөштүккө айланганына көңүл бурган Уралоглу, президент Режеп Таййип Эрдоган жана алжирдик кесиптеши Абдулмежид Теббундун тең төрагалыгында түзүлгөн «Жогорку деңгээлдеги кызматташтык кеңешинин» бардык тармактардагы мамилелерди мындан ары өнүктүрүү үчүн маанилүү платформа ролун ойногонун белгиледи.

Министр Уралоглу жолугушуудан кийин өткөрүлгөн биргелешкен маалымат жыйынында, эки өлкөнүн ортосундагы күчтүү карым-катнаштарды дагы да өнүктүрүү үчүн аракет кылгандарын билдирди.

Африканын дарбазасы болгон Алжирдин Түркия үчүн маанисин баса белгилеген Уралоглу, алжирдик кесиптеши Шарфанын эң кыска убакытта Түркияга келишин күтүшкөндөрүн айтты.

Алжирдин транспорт министри Шарфа да Уралоглунун сапарынын бул тармакта Алжир-Түркия өнөктөштүгү үчүн жол картасын түзө турганын, айрыкча деңиз транспорту, балык уулоо жана темир жол курулушу тармактарында кызматташтыктын көбөйө турганын маалымдады.

Түркиянын борбор калаа Алжирдеги метро иштеринин бүтүрүлүшүнө катыша турганын белгилеген Шарфа, Сетиф жана Сеййиди Билаббас шаарларында трамвай жолдорунун курулушу үчүн да сүйлөшүүлөр болоорун кабарлады.