Хакан Фидан кесиптеши Пак Чжин менен биргелешкен маалымат жыйынын өткөрдү

Тышкы иштер министри Хакан Фидан Түштүк Кореянын тышкы иштер министри Пак Чжин менен эки өлкөнүн карым-катнаштарын жаңы эл аралык динамикалардын негизинде кантип чыңдай ала тургандарын талкуулады.

Фидан борбор шаар Анкарада Тышкы иштер министрлигинде Пак Чжин менен жолугушуусунан кийин өткөрүлгөн биргелешкен маалымат жыйынында сөз сүйлөдү.

Эл аралык системада жаңы геосаясий жана геоэкономикалык теңдеменин пайда болгонун белгилеген Фидан, Азиянын да бул кыймылдуулуктун өзөгүндө турганын айтты.

5 кылымдан кийин Азиянын дүйнөнүн өндүрүш, технология, инновация жана соода борборуна айланганын маалымдаган Фидан, Батыш дүйнөсү борбордук позициясын жоготуп, дүйнөлүк саясаттын тартылуу борбору чыгышка жылганын билдирди.

Бул жагдайдын Азияга кызыгууну жана атаандаштыкты арттырганын баса белгилеген Фидан, Түштүк Кореянын Түркиянын стратегиялык өнөктөшү экенин айтты.

Министр Фидан: «Бүгүн кол койгон жол картасы ушул багыттагы жалпы эркибиздин белгиси. 1,5 жылга жакын убакыттан бери кылдаттык менен иштелип чыккан жол картасы мамилелердин институционалдык негизин сызууда. Байланыштан транспортко, саламаттыкты сактоодон технологияга, билим берүүдөн маданиятка, спорттон айыл чарбага чейин ар бир тармакта таштала турган кадамдарды комплекстүү түрдө сунуштайбыз»,-деди.

Маалымат жыйынынын алдында эки өлкөнүн тышкы иштер министрлери «Динамикалык Түркия-Корея карым-катнаштары үчүн жол картасы» аттуу жол картасына кол коюшту.