Назарбаев нааразылык акцияларынан кийин биринчи жолу коомчулукка кайрылуу жасады

Казакстандын туңгуч президенти Нурсултан Назарбаев 2-январда башталып, 225 адамдын өмүрүн алган нааразылык акцияларынан кийин биринчи жолу коомчулукка видео кайрылуу аркылуу кайрылды.

Назарбаевдин басма сөз катчысы Айдос Укибай Казакстандын экс-президенти Назарбаевдин коомчулукка кайрылуусунун видео кайрылуусун Twitter баракчасында бөлүштү.

Назарбаев өз кайрылуусунда өлкөдөгү окуялар бардыгын таң калтырганын белгилеп: «Бул козголоң жана кол салуулар өлкөнүн бүтүндүгүн жана мамлекеттин негизги принциптерин бузууга багытталган уюмдашуу болуп саналат»,-деди.

Назарбаев өз кайрылуусунда төмөнкүдөй сөздөрдү колдонгон:«Бул окуялар эгемендүүлүктүн көздүн карегиндей сакталышы жана өзгөчө морт кемедей бапестеп багуу керектигин дагы бир жолу көрсөттү. Кырсык баарыбызга сабак болду. Бул кол салуулардын жана адам өлтүрүүлөрдүн баарын ким уюштурганын аныктоо маанилүү. Бул суроого тергөө жооп берет».

Басма сөздө өзүнө тагылган айыптарга токтолуп Назарбаев: «Булардын баарына жооп катары мен муну белгилеп кетким келет. 2019-жылы мен Касым-Жомарт Токаевге президенттик ыйгарым укуктарды тапшыргам жана ошондон бери пенсиядамын. Мен азыр да пенсиядамын, Казакстандын борборундамын жана эч кайда кеткен жокмун»,-деди.

Назарбаев президент Касым-Жомарт Токаевдин Коопсуздук кеңешинин төрагасы катары толук ыйгарым укуктарга ээ болгонун жана жакында Нур Отан партиясынын төрагасы болуп шайлана турганын билдирип:«Ошондуктан элита арасында эч кандай кризис жана чыр-чатактар ​​жок. Бул темадагы билдирүүлөр таптакыр негизсиз»,-деп айтты.

Казакстан үчүн 30 жыл талыкпай иштегенин белгилеген Назарбаев сөзүн мындай улады: «Биз мамлекеттик чек араларды бекемдедик. Биз прогрессивдүү реформаларды жүргүздүк. Эгемендүү Казакстанды бирге түздүк. Биз Борбор Азияда эле эмес, региондо да көптөгөн тармактарда социалдык-экономикалык өнүгүүдө чоң натыйжаларга жетиштик. Казакстан дүйнөлүк коомчулукта таанылган жана таасирдүү өлкөгө айланды».

Назарбаев өлкөдөгү туруктуулукту жана тынчтыкты ар дайым биринчи орунга коёрун билдирип:«Биз баарыбыз бул туруктуу баалуулуктарды коргошубуз керек. Биз кризисти сөзсүз жеңебиз жана күчтөнөбүз»,-деди.

Президент Токаевдин элдин жыргалчылыгын жогорулатууга багытталган жаңы реформаны демилгелегенин белгилеген Назарбаев, муну колдоо керектигин билдирди.