Грузиядагы окуялар

Грузиянын баш калаасы Тбилисиде уланып жаткан демонстрацияларда 298 киши кармалып, 143 полиция жараланды.

Ички иштер министринин орун басары Александр Дарахвелидзе Грузиянын Евробиримдикке (ЕБ) кирүү боюнча сүйлөшүүлөрүн 2028-жылга чейин токтотконуна каршы болуп жаткан нааразылык акцияларында кармалгандар жана жарадар болгон полиция кызматкерлери тууралуу маалымат берди.

Парламент имаратынын алдында бир нече күндөн бери уланып жаткан демонстрацияларга катышкан айрым активисттердин полицияга күч колдонгонун белгилеген Дарахвелидзе окуяларда ушул убакка чейин 143 полиция кызматкеринин жараланганын белгиледи.

298 кишинин кармалганын айткан Дарахвелидзе тергөөнүн уланып жатканын билдирди.

Грузиянын акыйкатчысы Леван Иоселиани кечээги билдирүүсүндө полиция кармалган демонстранттардын көбүнө күч колдонгонун жарыялады.

Премьер-министр Ираклий Кобахидзе дагы бир жолу оппозиция тарапкерлерин туруксуздукту жаратып жатат деп айыптады.

Ошол эле учурда 28-ноябрда өкмөттүн Европа Биримдигине мүчөлүк сүйлөшүүлөрүн токтотуу чечимине каршы башталган демонстрациялар 6-күнү баш калаа Тбилисиде ар башка шаарларда улантылды.

Тбилисиде кечинде парламент имаратынын алдына кайрадан чогулган демонстранттар Шота Руставели көчөсүн унаа кыймылы үчүн жапты. Полиция аймакта кеңири коопсуздук чараларын көрдү.

Митингчилердин таш, таяк жана жардыргыч заттар менен кол салууларына кайра-кайра жооп кайтарган полициянын атайын күчтөрү саат 05:00 чамасында (жергиликтүү) суу басымы бар унаалар менен демонстранттарга кийлигишти. Демонстранттар артка чегинүүгө аргасыз болду.

Бир тараптан Конституциялык сот президент Саломе Зурабишвилинин 26-октябрдагы парламенттик шайлоонун жыйынтыгына каршы чыгып, шайлоону жокко чыгаруу доо арызын четке какты.

Конституциялык соттун жазуу түрүндөгү билдирүүсүндө, президент Зурабишвили менен кээ бир оппозициялык партиялар менен бейөкмөт уюмдардын шайлоонун жокко чыгарылышы үчүн берген арызынын кабыл алынбаганы белгиленди.

Билдирүүдө шайлоонун жыйынтыгын жокко чыгаруу боюнча 19-ноябрда сотко берилген доо арыздын четке кагылганы баса белгиленип, «Чечим акыркы жана каршылыкка жана кароого жатпайт» деп айтылды.

Президент Зурабишвили бул чечимге байланыштуу маалымат жыйынын өткөрүп, Конституциялык сот өлкөнүн конституциялык түзүлүшүнө кайтуу мүмкүнчүлүгүн колдон чыгарып жибергенин жүйө келтирип, «Өлкөдө мындан ары мыйзамдуу бир дагы институт калбады» деди.

Грузияда 26-октябрда өткөн парламенттик шайлоодо бийликтеги «Грузин кыялы» партиясы 53,93 пайыз добуш менен жеңишке жеткен.

Президент Зурабишвили колдогон оппозициялык партиялар бийликти шайлоону бурмалады деп айыптап, шайлоонун жыйынтыгын тааныбай турганын жарыялашты жана көчө акцияларын баштады.

Демонстрацияларга карабастан, парламент 28-ноябрда премьер-министр Кобахидзе түзгөн жаңы кабинетке ишеним көрсөттү.

Шайлоонун жыйынтыгына ылайык, 150 орундан турган парламентте «Грузин кыялы» партиясынын 89, оппозициянын 61 депутаты бар.