Tesla 2 миң 431 унаасын чакыртып алды

Америкалык электр унаа өндүрүүчүсү Tesla 2 миң 431 даана Cybertruck унаасын чакыртып алды.

Америка Кошмо Штаттарынын (АКШ) Улуттук Жол кыймылы коопсуздугу боюнча башкармалыгы (NHTSA) тарабынан жарыяланган билдирүүдө, бул чечимдин 2023-жылдын 6-ноябрынан 2024-жылдын 30-июлуна чейин чыгарылган айрым Cybertruck унааларын камтыганы айтылды.

Билдирүүдө 2 миң 431 унаанын инвертордогу бузулуулардан улам кайра чакыртылып алынганы белгиленди.

Ушундайча акыркы чечим менен Тесланын Cybertruck унаасы быйыл алтынчы жолу чакыртылды.

Тесла октябрда да артын көрүүчү камерадагы көйгөйдөн улам АКШдагы 27 миңден ашык Cybertruck унаасын кайра чакыртып аларын жарыялаган.