Амазонкадагы кургакчылык, суунун деңгээлинин төмөндөшү

Амазонкадагы кургакчылыктан улам аймактагы кээ бир дарыяларда суунун деңгээли тарыхтагы эң төмөнкү деңгээлге азайды.

Бразилиянын геологиялык кызматы жарыялаган отчетто, Порту Велхо шаарында нормада орточо 3,32 метр болгон Мадейра дарыясында суунун деңгээли 48 сантиметрге чейин азайганы маалымдалды.

Отчетто Амазонка чөлкөмүндөгү башка дарыя Солимоестеги суунун деңгээли тарыхтагы эң төмөнкү деңгээлге түшкөнү белгиленди.

Бразилиянын Улуттук табигый кырсыктарды эскертүү жана байкоо борбору (Cemaden) өлкөнүн жүздөн ашуун аймагында 5 айдан ашык убакыттан бери жамгыр жаабаганын белгилеп, Амазонка бассейниндеги кургакчылыктын «эң күчтүү жана эң кеңири жайылган» кургакчылык экенин жарыялады.

Кургакчылыкка себеп болгон факторлордун арасында глобалдык жылуулук, аймактагы токойлордун кыйылышы жана 2023-жылы таасирин тийгизген Эль-Нино аба ырайы кубулушу бар.