Израилдин Газага кол салуулары уланып жатат

Израилдин Газа тилкесинин түндүгүндөгү Жебалия качкындар лагери менен Газанын түштүгүндөгү Зейтун районуна кол салууларында 5 палестиналык каза болуп, көп сандаган палестиналык жараланды.

Палестинанын расмий кабар агенттиги WAFAнын маалыматына караганда, Жебалия лагеринин Аль-Фахура аймагындагы бир үйгө Израиль аскерлеринин кол салуусунун натыйжасында 3 киши каза тапты.

Кол салууда жарадар болгондор лагердеги Кемал Адван ооруканасына жеткирилди.

Израиль армиясынын Газанын түштүгүндөгү Зейтун районунун Кашко көчөсүнө жасаган кол салуусунда 2 палестиналык каза болуп, көп сандаган киши да жараланды.

Израиль күчтөрүнүн Газа тилкесинин борбордук бөлүгүндөгү Эль-Бурейж лагеринин түндүгүндөгү аба соккуларында да көп сандаган үй талкаланды.

Нусейрат качкындар лагериндеги бир үй согуштук учак менен бомбаланып, Сабра районундагы үйлөр да артиллериялык чабуулдун бутасы болду.

Бир тараптан Израиль армиясы Газада дагы бир мектепке сокку урду.

Кол салууда балдар жана Бириккен Улуттар Уюмунун кызматкерлери да арасында болгон 18 киши каза тапты.

Батыш Шерианын Тулкерим шаарында Израиль күчтөрүнүн бир унаага абадан кол салуусунда 3 палестиналык көз жумду, Тулкерим баш калкалоочулар лагеринде иштеген 5 палестиналык Кызыл Жарым Ай кызматкери да камакка алынды.