Израилде Нетаньяхунун өкмөтүнө нааразылык акциялары өтүп жатат

Израилде жүз миңдеген киши Газада ок атышпоо жана туткундарды алмашуу келишимине кол коюуну каалабаган премьер-министр Беньямин Нетаньяху менен өкмөтүнө каршы демонстрацияга чыгышты.

Газа тилкесинде 6 израилдик туткундун сөөгү табылганы жарыялангандан кийин ок атышпоо жана туткун алмашуу келишимин саботаж кылганы үчүн сынга алынган Нетаньяху жана өкмөтүнө каршы нааразылык акциялары башталды.

Демонстрациялардын борбору борбор Тель-Авивде Коргоо министрлиги жайгашкан Менахем Бегин жана Каплан көчөлөрү болду.

Демонстрацияны уюштурган топтор Тель-Авивдеги нааразылык акцияларына болжол менен 300 миң киши катышканын, өлкө боюнча демонстрацияларга катышкандардын саны 500 миңден ашканын билдирди.

Бул жерде курулган сахнага Израиль желектерине оролгон 6 туткун үчүн 6 табыт коюлду.

Газа тилкесиндеги израилдик туткундардын жакындары жана артисттер сахнадан чыгып сүйлөп, Нетаньяху менен анын өкмөтүнүн «абактагыларды алмашуу келишимине кайдыгерлигин жана каалабагандыгын» сынга алышты.

Израилдин эң ири жумушчу профсоюзу болгон Хисдатруттун төрагасы Арнон Бар-Дэвид өз сөзүндө эртең бүт өлкө боюнча иш таштоо боло турганын билдирип: «Эртең Израиль жумушка чыкпайт, порттор, фабрикалар, кеңселер жабылат»,- деди.

Колдорунда Израилдин желектерин көтөргөн демонстранттар да премьер-министр Нетаньяху жана анын өкмөтүндөгү саясатчыларга каршы баннерлер, плакаттар жана девиздерди алып чыгышты.

Демонстранттар барабандарды жана ышкырыктарды кагып, израилдик туткундарды мүмкүн болушунча тезирээк үйлөрүнө кайтарууну талап кылышты жана «Баардыгы дароо үйгө» жана «Жардам» деген баннерлерди көтөрүп чыгышты. Демонстранттар «(Нетаньяху) Биби, туткундарды бошоткула», «Сен жооптуусуң, сен күнөөлүүсүң» деген ураандар менен чыгышты.

Бул жерде өткөрүлгөн демонстрациядан кийин топтор шаардын негизги жолдоруна бет алышты.

Демонстранттарды темир тосмолордун артына жайгашкан Израиль полициясы өткөрбөй коюуга аракет кылды.

Көптөгөн жерлерде тараптардын ортосунда мушташ болгон.

Ар түрдүү жолдорду басып, полициянын тосмолорун ашып өткөн демонстранттар шаардын негизги артериясы Аялон шоссе жолун эки тараптуу кыймылга жапты.

Демонстранттар трассанын көп жерлеринде от жагып, бир нече жолу фейерверк атышты.

Израиль полициясы демонстранттарга атчан аскерлер жана үн бомбалары менен кийлигишти.

Демонстранттар менен кагылышкан Израиль полициясы Тель-Авивде 15 кишини кармаганын жарыялады.

Тель-Авивде, Хайфада жана Батыш Кудста, ошондой эле өлкөнүн ар кайсы аймактарында өткөрүлгөн жүрүш жана нааразылык акцияларында өкмөттүн отставкага кетиши жана туткундардын кайтарылышын талап кылынды.

Хайфада миңдеген адамдар чогулуп, шаардын борборундагы кесилиштерди унаа кыймылы үчүн жаап, от жагышты.

Бул жерде да демонстранттарга каршы Израиль полициясы кийлигишкенде мушташ чыкты.

Мындан тышкары, Тель-Авивдеги демонстранттар шаардын негизги магистралдарынын бирин бир тараптуу кыймыл үчүн жаап, жолдогу дөңгөлөктөрдү өрттөштү.

Өлкө боюнча демонстранттар нааразылык акциялары маалында айрым жолдордо жана кесилиштерде жол кыймылын жаап салганы тууралуу маалыматтар бар.