БУУ хуситтер тарабынан барымтага алынган кызматкерлерин бошотууну талап кылды

Бириккен Улуттар Уюмунун (БУУ) баш катчысы Антониу Гутерриш Йеменде хуситтер тарабынан барымтага алынган БУУнун кызматкерлери менен башка уюмдардын мүчөлөрүнүн «дароо жана эч кандай шартсыз» бошотулушун талап кылды.

Антониу Гутерриш өзүнүн жазуу түрүндөгү билдирүүсүндө, хуситтер тарабынан негизсиз камакка алынган БУУнун кызматкерлеринин жана бейөкмөт уюмдар, улуттук жана эл аралык бейөкмөт уюмдар, дипломатиялык өкүлчүлүктөр жана жеке сектор сыяктуу уюмдардын мүчөлөрүнүн жыргалчылыгы жөнүндө  терең тынчсыздануусун улантып жатканын жана бул адамдардын токтоосуз жана шартсыз бошотулушун талап кылаарын билдирди.

Башкы катчы кармалгандардын адам укуктары «толугу менен сакталышы» керектигин жана алар үй-бүлөлөрү жана мыйзамдуу өкүлдөрү менен байланыша алышы керектигин дагы бир жолу белгиледи.

Баш калаа Санадагы БУУнун Адам укуктары боюнча жогорку комиссарлыгынын кеңсесинин имаратына хуситтердин күч менен киришин «катуу» айыптаган Гутерриш, кеңсенин кечээ БУУ жооптууларына кайтарылганы тууралуу маалыматын бөлүштү.

Антониу Гутерриш ошондой эле Йеменде 18 миллиондон ашык адам башынан өткөргөн тамак-аш тартыштыгы, эпидемиялар, жер которуу жана кыйраган экономика сыяктуу олуттуу кыйынчылыктарга токтолду.

Хуситтер БУУнун кеңсесин басып алышты

БУУнун Адам укуктары боюнча жогорку комиссары Фолькер Түрк 13-августта хуситтер БУУнун Санадагы адам укуктары кеңсесин тинтип, БУУнун кызматкерлерин камакка алганын жарыялады.

Хуситтердин билдирүүсүндө, «гуманитардык жардам уюмдарына жамынып иштеген АКШ-Израиль тыңчылык тармагынын мүчөлөрүнүн» кармалганы жарыяланган.

Йеменде Иран колдогон хуситтер 2014-жылдын сентябрынан бери борбор Сана жана кээ бир аймактарды көзөмөлдөп турушат.

Сауд Арабия жетектеген коалиция күчтөрү 2015-жылдын март айынан бери хуситтерге каршы Йемен өкмөтүн колдоодо.