Запорожье атомдук электр станциясында өрт чыкты

Орусия аннексиялап алган Запорожье атомдук электр станциясында (АЭС) өрт чыкты.

Орусиянын Мамлекеттик атомдук энергетика корпорациясы Росатом АЭСтин муздатуу системасындагы өрттүн чоң өлчөмдө өчүрүлгөнүн кабарласа, Орусия менен Украина бири-бирин айыптады.

Росатомдун орус маалымат агенттиктерине жасаган билдирүүсүндө, Запорожье АЭСинин муздатуу системасындагы өрттүн Украинанын учкучсуз учуучу аппараттар (УУА) менен жасаган чабуулунан улам чыкканы белгиленди.

Билдирүүдө АЭСтин муздатуу системасына олуттуу зыян келтирген кол салуунун натыйжасында чыккан өрттүн чоң өлчөмдө өчүрүлгөнү белгиленип: «Бул окуяны украин бийликтеринин өзөктүк терроризми катары бааласа болот»,делди.

Запорожьенин аймактык губернатору Евгений Балицкий да жазуу түрүндөгү билдирүүсүндө өрттүн көзөмөлгө алынганын жана аймак үчүн эч кандай коркунуч жок экенин билдирди.

Балицкий мурунку жазуу түрүндөгү билдирүүсүндө Украина армиясынын артиллериялык аткылоо менен жасаган чабуулунан улам Запорожье АЭСинин муздатуу системасында өрт чыкканын билдирген.

Украинанын президенти Владимир Зеленский: «Өрттү Орусия баштаган»,- деп билдирди.

Зеленский өзүнүн X социалдык тармагындагы билдирүүсүндө: «Запорожье АЭС чөлкөмүндө орус баскынчылары өрт чыгарганын каттадык»,- деп жазды.

Радиация деңгээлинин алгачкы аныктамалар боюнча нормалдуу болгонун белгилеген Зеленский, мунун баштапкыдай уланбашы мүмкүн экенин айтты.

Зеленский Орусия атомдук электр станциясын басып алган биринчи күндөн бери Украинаны, Европаны жана дүйнөнү шантаж кылуу үчүн колдонуп жатканын айтты.

Зеленский дүйнөнүн жана Атомдук энергия боюнча эл аралык агенттиктин (МАГАТЭ) чара көрүшүн күтөөрүн баса белгилеп: «Орусия бул үчүн жооп бериши керек. Запорожье атомдук электр станциясын Украинанын көзөмөлгө алышы гана нормалдуу абалга кайтып келүүгө жана толук коопсуздукка кепилдик бере алат»,-деди.

Атомдук энергия боюнча эл аралык агенттиктин X эсебинен бул тема боюнча жасалган билдирүүсүндө: «МАГАТЭнин эксперттери кечээ кечинде бир нече жардыруулардан кийин Запорожье АЭСинин түндүк аймагынан чыккан коюу кара түтүнгө күбө болушту. Командага станциянын муздаткыч мунараларынын бирине учкучсуз учуучу аппарат менен кол салуу болгон деген божомолду билдирди. Өзөктүк коопсуздук жагынан эч кандай таасири билдирилген жок»,-деп айтылды.

Украинанын түштүк-чыгышындагы Запорожье атомдук электр станциясы Европадагы эң ири атомдук электр станциясы.

АЭСти орустар 2022-жылдын март айында басып алышкан. Учурда орус армиясынын көзөмөлүндө болгон станциянын айланасында артиллериялык жана учкучсуз учуучу аппараттар менен кол салуулар болуп жатканда, Украина менен Орусия бири-бирин күнөөлөп жатышат.