Блинкен БАЭ жана Сауд Арабиялык кесиптештери менен жолугушту

Америка Кошмо Штаттарынын (АКШ) мамлекеттик катчысы Энтони Блинкен Бириккен Араб Эмираттарынын (БАЭ) тышкы иштер министри шейх Абдулла бин Заид Аль Нахайян жана Сауд Арабиянын тышкы иштер министри Фейсал бин Фархан Аль Сауд менен жолугушту.

Тышкы иштер министрлигинин басма сөз катчысы Мэтью Миллердин жазуу түрүндөгү билдирүүсүндө, Блинкендин Бириккен Араб Эмираттары жана Сауд Арабиялык кесиптештери менен Жакынкы Чыгышта уланып жаткан чыңалуу жана окуяларга байланыштуу жолукканы маалымдалды.

Блинкендин Аль Нахайян менен жолугушуусунда «Газага гуманитардык жардамдын көбөйүшүнө жана туруктуулугуна шарт түзө турган ок атышпоону камсыз кылуу жана туткундарды бошотуу үчүн» дипломатиялык аракеттер тууралуу пикир алмашылганы белгиленди.

АКШнын мамлекеттик катчысы Газада келишимге жетишүү ниетин дагы бир жолу кайталаган жолугушууда, бул жумада шашылыш дарыланууга муктаж 148 палестиналыктын эвакуацияланышы менен бирге БАЭнин газалыктарга көрсөткөн маанилүү гуманитардык колдоосу үчүн ыраазычылык билдиргени айтылды.

Блинкен Сауд Арабиялык кесиптеши бин Фархан менен жолугушуусунда да Газада ок атышпоо жана туткундардын бошотулушу темаларынын артыкчылыктуу экенин баса белгиледи.

Блинкендин Сауд Арабиянын Газага жардам жеткирүү аракетин жогору баалаганы кабарланды.

Эки министрдин ошондой эле Судан армиясы менен Ыкчам колдоо күчтөрүнүн август айына пландалган ок атышпоо сүйлөшүүлөрүнө катышуулары, кагылышууну токтотуу жана гуманитардык жардамдын муктаж болгондорго жетүүсү үчүн макулдашуунун маанилүүлүгүнө көңүлдөрдү бурганы белгиленди.