Линдмайер: «Газа тилкесинде дагы 10 миң адам медициналык эвакуацияга муктаж»

Дүйнөлүк Саламаттыкты сактоо Уюмунун (ДССУ) басма сөз катчысы Кристиан Линдмайер Израилдин катуу кол салууларына кабылган Газа тилкесинде 10 миң кишинин медициналык эвакуацияга муктаж экенин билдирди.

Линдмайер БУУнун Женева кеңсесинин жумалык маалымат жыйынына онлайн катышып, баа берди.

Анадолу агенттигинин кабарчысы: «Бир топ оорулуу жана жарадар болгон палестиналыктардын дарылоосу ДССУнун координациясы менен Газа тилкесинин сыртында жүргүзүлө турганы тууралуу кабарды көрдүк. Ушул алкакта кээ бир бейтаптар жана коштоочулары Дейр-Балах шаарынан чыгып кетишти. Бул демилге жана эвакуациялар тууралуу маалымат бере аласызбы?» деген суроого жооп берген Линдмайер бул жакшы кабар экенин айтты.

Линдмайер: «Алгач 4 бала жана шериктери Египет аркылуу Бельгияга эвакуацияланды. Азыр дагы көп бала Газадан кетип жатат, бирок операция уланып жаткандыктан азырынча так сандарга жете албайбыз»,-деди.

Операция аяктаганда керектүү маалыматтарды бөлүшө тургандарын белгилеген Линдмайер: «Газа тилкесинде дагы 10 миң киши медициналык эвакуацияга муктаж»,- деди.

Линдмайер ок атышпоо чакырыгын кайталап, өлкөлөрдүн Газада дарыланууга муктаж адамдарды кабыл алуусунун маанилүүлүгүнө көңүл бурду.