Ханс Дас: «Акыркы жылдарда биз күбө болгон эң чоң жер титирөөлөрдүн бири»

Европа Биримдиги (ЕБ) Комиссиясынын өзгөчө кырдаалдар боюнча адиси Ханс Дас Түркиядагы жер титирөөлөр тууралуу: «Бул акыркы жылдары биз көргөн эң чоң жер титирөөлөрдүн бири»,-деди.

Европа Жарандык Коргоо жана Гуманитардык Жардам Операциясынын (ECHO) өзгөчө кырдаалдарды башкаруу директору Дас, Европа Биримдиги Комиссиясынын чукул кырдаалдар координациялык борборунда жер титирөө жана андан кийинки издөө-куткаруу иштерине кошкон салымы тууралуу түрк журналисттерине маалымат берди.

Жер титирөөнүн чоңдугуна жана таасирине баа берген Дас мындай деди: «Бул акыркы жылдары биз күбө болгон эң чоң жер титирөөлөрдүн бири. Анын таасири абдан чоң жана кеңири аймакка жайылды. Бул чындап эле кайгылуу».

Жер титирөөдөн жапа чеккендерге колдоо көрсөтүү жана Түркия менен Сирияга жардам берүү үчүн колунан келгендин баарын кылгандарын белгилеген Дас, жер титирөөдөн кыска убакыт өткөндөн кийин түрк бийликтеринен чакыруу алгандарын, издөө куткаруу топторун мобилизациялагандарын баса белгилеп, Европа Биримдиги өлкөлөрүнүн да бул чакырыкка тез жооп бергенин айтты.

Коперник спутник кызматынын жер титирөө жана издөө-куткаруу иштерине кошкон салымына токтолгон Дас, спутниктен тартылган сүрөттөрдүн абдан деталдуу боло аларын жана зыянды аныктоо жана зыяндын көлөмүн аныктоо жагынан абдан пайдалуу экенин айтты.

Дас жолдордун абалы боюнча да бул көрүнүштөрдүн абдан пайдалуу экенин, критикалык алгачкы сааттарда жана күндөрдө жардам жөнөтүү жагынан маанилүү экенин белгиледи.

Дас: «Биз спутниктен тартылган сүрөттөрдү жардам көрсөтүүдө колдонушу үчүн түрк бийликтери менен  бөлүшөбүз»,-деди.

Түрк бийлиги менен кызматташуу тууралуу да маалымат берген Дас: «Бизде AFADдагы (Кырсыктарды жана өзгөчө кырдаалдарды башкаруу боюнча төрагалык) кесиптештерибиз менен мыкты кызматташтык жана байланыш бар. Алар учурда жардам көрсөтүү аракеттерин координациялоодо чоң иш алып барышууда. Бизде абдан жакшы жана тез байланыш бар»,-деди.