Түндүк Корея АКШдан келген ар кандай коркунучтарга жооп берүүгө даяр экенин билдирди
Бул тууралуу Түндүк Кореянын Тышкы иштер министрлиги билдирүү жасады.
Түндүк Корея Америка Кошмо Штаттарынын (АКШ) Түштүк Корея менен аскердик машыгууларын күчөтүүсү чыңалууну күчөттү деген жүйө менен кыска мөөнөттүү же узак мөөнөттүү ар кандай коркунучка «эң көп ядролук күч» менен жооп берүүгө даяр экенин билдирди.
Түндүк Кореянын Тышкы иштер министрлиги АКШнын коргоо министри Ллойд Остиндин Түштүк Кореяга жаңы муундагы жашыруун согуштук учактар жана учак ташыгычтар сыяктуу дагы стратегиялык аскердик мүлктөрдү жайгаштыра тургандарын жарыялоосунан кийин билдирүү жасады.
Билдирүүдө, АКШнын Түштүк менен биргелешип өткөргөн аскердик машыгууларына жооп иретинде АКШ күчтөрүнүн «душмандык аракеттеринен» улам Корей жарым аралындагы жана аймактагы аскердик жана саясий абалдын «кызыл сызыктан» өткөнү белгиленди.
АКШ жана Түштүк Корея тарабынан уюштурулган аскердик машыгуулардын аймакты согуш аймагына айландыра турганы айтылган билдирүүдө Түндүк Кореянын кыска же узак мөөнөттүү ар кандай коркунучтарга каршы «аса күчтүү ядролук күч» менен жооп берүүгө даяр экени билдирилди.
Билдирүүдө АКШнын мүмкүн болгон согуштук демилгесине «ядролук куралга каршы ядролук жооп жана ядролук куралга каршы жалпы согуш» принциби менен жооп кайтарыла тургандыгы баса белгиленген.
Америка Кошмо Штаттары Корей жарым аралында жана анын айланасында аскердик аракеттерин уланта берсе, «Түндүк Корея табигый түрдө өзүнүн токтотуучу күчүн колдонот»,- деп айтылды.
Америка Кошмо Штаттарынын Түндүк Кореяны «бир тараптуу куралсыздандырууга» мажбурлоо үчүн санкцияларды жана аскерий кысымдарды улантып жатканына көңүл бурулган билдирүүдө, «душмандык саясатын» уланта турган болсо АКШ менен Пхеньяндын диалогго барбай турганы баса белгиленди.
АКШнын Коргоо министри Ллойд Остин 30-январда Түштүк Кореяга жасаган эки күндүк иш сапарынын алкагында биргелешкен коргонуу милдеттенмелерин кайталап, алар бул өлкөгө жаңы муундагы жашыруун согуштук учактар жана учак конуучу кемелер сыяктуу дагы стратегиялык аскердик активдерди жайгаштырышарын жарыялады.
