Кытайда акыркы 54 жылдын эң суук күнү

Кытайдын Хэйлунцзян аймагындагы Мохе шаарында абанын температурасы минус 53 градуска чейин төмөндөп, акыркы 54 жылдын эң суук күнү болду.

Би-Би-Синин кабарына караганда, Мохеде абанын температурасы 22-январда жергиликтүү убакыт боюнча саат 07.00дө 53 градус суук болду.

Бул Мохеде 52,3 градус суук болгон 1969-жылдан берки эң суук аба катары катталды.

Кытайдын эң суук аймагы болуп эсептелген жана өлкөнүн Түндүк уюлу деп аталган Мохеде кыш мезгили жалпысынан 8 айга созулат.

Өлкөнүн кышкы туризм борборлорунун бири болгон Мохе жыл бою туристтерди кабыл алууда.