Украинадагы кол салуулар, көчүрүү, уурдоо, курмандыктар...

Орус армиясынын Украинанын Львов шаарындагы Эл аралык тынчтык жана коопсуздук борборуна кол салуусунун натыйжасында каза болгондордун саны 35ке, жаракат алгандардын саны 134кө жетти.

Орус аскерлери эртең менен Польшанын чек арасынан 25 чакырымдай алыстыктагы ​​Львов шаарынын батышында жайгашкан Яворив аймагындагы аскердик машыгуу базасына сокку урду.

Украинанын стратегиялык байланыш жана маалымат коопсуздугу борбору (Stratcom UA) кол салууга байланыштуу акыркы абалдарды билдирген билдирүүсүндө,«Европа Биримдиги (ЕБ)/НАТО чек арасына жакын жердеги Яворив аскердик машыгуу базасынын бомбалоосунда каза болгондордун саны 35ке жетти. Жабыркаган 134 адам ооруканага жаткырылды. Куткаруучулар урандылардын көбүн чыгарышты. Бирок урандылардын астында аман калгандар дагы болушу мүмкүн деген божомол бар»,делди.

Украинанын Николаев губернатору Виталий Ким да орус армиясынын шаарга ракеталык кол салуусунда 9 кишинин каза болгонун жарыялады.

Украинанын коргоо министри Алексей Резников чет элдик инструкторлор иштеген эл аралык тынчтык жана коопсуздук борборун бутага алган кол салууга жооп кайтарып: «Бул Европа Биримдиги (ЕБ)-НАТО чек арасына жакын жерде тынчтыкка жана коопсуздукка багытталган жаңы террордук чабуул. Аны токтотуу үчүн тийиштүү чаралар көрүлүшү керек. Украинанын асманын жапкыла»,-деп чакырды.

Львов муниципалитети орус армиясынын эртең менен Эл аралык тынчтыкты сактоо жана коопсуздук борборуна 8 ракета менен кол салганын билдирди.

Ал арада Украинанын тышкы иштер министри Дмитрий Кулеба өзүнүн социалдык медиа баракчасында орус согуштук кылмышкерлери Днепрудне мэри Евгений Матвеевди барымтага алганын жарыялады.

Украинанын Донецк аймагында катуу кагылышуулардын ортосунда калгандарды эвакуациялоо операциясында колдонулган жүргүнчү поездге орус армиясы тарабынан ачылган октон 1 кишинин каза болгону, бир кишинин жараланганы билдирилди.

Украин темир жолдору Укрзализницанын билдирүүсүндө, орус аскерлеринин Донецк аймагындагы Брусын станциясынын жанында жүргүнчүлөрдү ташыган поездге ок чыгарганы белгиленди.

Билдирүүдө, «Поезд жаңжал болгон аймактагы Донецк жана Луганск райондорунун тургундарын алып кетүү үчүн Лайман шаарына эвакуациялоо иштерин жасап жаткан»,делди.

Кол салууда поезддеги бир кондуктордун каза болгону, бир кишинин да жараланганы белгиленген билдирүүдө, «Укрзализнициа ушул мүнөттөрдө бузулган поезддин экипажын жана бардык жүргүнчүлөрдү, анын ичинде Лайман вокзалында куткарууну күтүп жаткан 100гө жакын баланы эвакуациялоо үчүн бардык аракеттерди көрүп жатат»,-деп айтылган.

Украинанын Ивано-Франковск шаарынын мэри Руслан Марцинкив социалдык медиа аркылуу билдирүү жасап, шаардын эл аралык аэропортун орус армиясы абадан бомбалаганын белгилеп, «Душмандын максаты - дүрбөлөң жана коркунуч жаратуу», деген сөздөргө орун берген.

Украина Прокуратурасы Орусиянын Украинада баштаган согушунда 24-февралдан 13-мартка чейин орус куралдуу күчтөрүнүн кол салууларынан 85 баланын каза болгонун, 100гө жакыны жараланганын билдирди.

Орус армиясы менен согуш уланып жаткан шаарларда ачылган гуманитардык коридорлор аркылуу ишемби күнү 13 миңге жакын украиналыктын коопсуз аймактарга эвакуацияланганы билдирилди.

Украинанын вице-премьер-министри Ирина Верещук, орус армиясы менен согуш уланып жаткан ар башка аймактарда ишемби күнү ачылышы пландалган 14 гуманитардык коридордун 9унун колдонулушу мүмкүн экенин айтты.

Кечээ Суми, Краснополье, Писаревка, Конотоп, Лебедин, Буча, Гостомель, Немишаев конуштарындагы гуманитардык коридорлор иштеп жатканын жана бул каттамдардан эвакуациялар жасалганын белгилеген Верещук Энергодар, Ирпен, Ворцель, Козарович жана Бородянканы орус армиясы тосуп алганын билдирди.

Верещук бүгүн согуш уланып жаткан шаарлардагы украиналыктарды эвакуациялоо үчүн жаңы аракеттер көрүлө турганын билдирди.

Бир тараптан Украинанын президенти Владимир Зеленский орус армиясынан 13 миң аскер каза болгонун жарыялады.

Бир тараптан Украинанын Коргоо министрлигинен берилген жазуу түрүндөгү маалыматта орус армиясынын 24-февралдан 13-мартка чейинки жоготуулары тууралуу маалыматтар бөлүшүлдү.

Буга ылайык орус армиясынын 12 миңден ашуун жоокери набыт болуп, Орусиянын Куралдуу күчтөрүнө таандык 374 танк, 74 учак, 86 тик учак, 1226 бронетехника, 140 артиллерия, 62 ракета атуучу системасы, 34 абадан коргонуу системасы жана 600 унаа жок кылынды. .

Кошумчалай кетсек, орус армиясы Украинада 24-февралдан бери башталган согушта 3 жеңил ылдам жүрүүчү катер, 60 күйүүчү май унаасы жана 7 учкучсуз учуучу аппаратын жоготту.

Орусиянын Коргоо министрлиги жалпысынан Украинага таандык 3687 аскердик инфраструктура объектисинин жок кылынганын жарыялады.

Орус аскерлери 24-февралда Украинага чабуул кое баштаган.