"Тәжікістанның әрекеті - қасақана жасалған шабуыл"

Қырғызстан Сыртқы істер министрлігі Қырғызстан аумағында орын алған оқиғаларды Тәжікстан Республикасының Қырғызстанға қарсы «қасақана жасалған қарулы шабуылы» ретінде атады.

Сыртқы істер министрлігінен жасалған жазбаша мәлімдемеде «Тәжік тарапының адамгершілікке жатпайтын әрекеттері» нәтижесінде Қырғыз-тәжік шекарасында 46 Қырғызстан азаматының қаза тапқаны, 140 адамның жараланғаны, шамамен 140 мың адамның эвакуацияланып, үлкен материалдық шығын болғаны атап көрсетілді.

Мәлімдемеге қарағанда, Тәжікстан аумақтық тұтастық, мемлекеттік шекаралардың мызғымастығы, халықаралық дауларды бейбіт жолмен шешу, күш қолданбау, БҰҰ-дағы адам құқықтары мен бостандықтарын құрметтеу сияқты негізгі халықаралық қағидаттарды өрескел бұзды.

Осыған дейін Қырғызстан шекарасына әскерін тартқан Тәжікстан Қырғызстанның Баткен облысындағы қырғыз-тәжік мемлекеттік шекарасының бүкіл желісі бойынша шекаралық және азаматтық нысандар мен елді мекендерге шабуыл жасау үшін ауыр әскери техниканы пайдаланған. Атысты тоқтату келісімдеріне қарамастан, тәжік тарапы Қырғызстанның Баткен аймағындағы Достук, Ақсай, Интернационал, Жастик, Борбордук, Арқа, Кулунду сияқты кейбір елді мекендерді бомбалауын жалғастырды.

Қырғызстан Сыртқы істер министрлігінің мәлімдемесінде «Біз Тәжікстан Республикасының барлық келісімдерді бұзатын заңсыз және деструктивті әрекеттеріне қатаң наразылық білдіреміз» деп айтылды.

Мәлімдемеде сондай-ақ тәжік тарапының әрекеті кең ауқымды мемлекетаралық қақтығыстың туындауына және жалпы Орталық Азия аймағындағы жағдайдың тұрақсыздануына әкелуі мүмкін екендігі атап өтілді.

Қырғызстанның Сыртқы істер министрлігі екі ел арасындағы дауларды тек бейбіт жолмен және саяси-дипломатиялық жолдармен келіссөз үстелінде шешу қажеттігі туралы өзінің бұлжымас ұстанымын қайталады.