Түріксой мен Қожа Ахмет Ясауи университеті арасындағы ынтымақтастық

Түрік мәдениетінің халықаралық ұйымы Түріксойдың Бас хатшысы Сұлтан Раев Қазақстандағы сапары барысында Алматы мен Қызылордада ресми кездесулер өткізді. Артынан  Қазақстанның маңызды қаласы,  түркі әлемінің  рухани астанасы Түркістанда келіссөздер жүргізді.

Түркістан қаласындағы Қожа Ахмет Ясауи атындағы Халықаралық Түрік-Қазақ университетіне  барған Сұлтан Раев университет ректоры Жанар Темірбековамен кездесті.

Кездесу барысында Түріксой мен Қожа Ахмет Ясауи атындағы халықаралық Түрік-Қазақ университеті арасындағы көпжылдық ынтымақтастықтың жаңа кезеңде де одан әрі жалғасатыны баса айтылды. Алдағы кезеңде Түріксой ұйымымен жүзеге асырылатын бірлескен жобалар туралы пікір алмасылып,  күнтізбелік жоспар дайындалды. Осы шеңберде екі мекеме арасындағы тығыз жұмыс мүмкіндіктерін барынша тиімді пайдалануға келісім жасалды.

Түріксойдың көпір қызметін атқаруымен тараптар жақын арада екі университетті бір-біріне жақындату мақсатында Қырғызстан-Түркия «Манас» университеті мен Қожа Ахмет Ясауи университеті арасында өзара таныстыру күндерін өткізу туралы шешім қабылдады. Сонымен қатар Түркістанның материалдық емес мәдени мұрасын зерттеу, «Түркістан 2040» болашақ көзқарасы тұжырымдамасын бірлесіп орындау, түркология ғимаратын ашу сынды мәселелер бойынша ынтымақтастық орнату туралы шешім қабылданды.

Түріксой мен университет арасындағы алдағы уақытта атқарылатын көптеген бірлескен жұмыстар талқыланған кездесуден кейін екі мекеме арасында ынтымақтастық хаттамасына қол қойылды.