Түріксой стипендиясы берілді

Әл-Фараби атындағы Қазақ Ұлттық Университеті Шығыстану факультеті жанындағы Түріксой кафедрасы студенттеріне жыл сайын берілетін Халықаралық Түрік мәдениеті ұйымы стипендиясы биыл да берілді.

Түріксой кафедрасының табысты студенттерін ынталандыру және материалдық көмек мақсатында бір мәрте берілетін 100 мың теңге стипендияны Әл-Фараби Қазақ Ұлттық Университеті ректоры Ғалымқайыр Мұтанов және Түріксой бас хатшысы Дүйсен Қасейінов табыс етті.

Осында сөз сөйлеген Дүйсен Қасейінов Әл-Фараби Университетінің халықаралық деңгейдегі табысын мақтан тұтатынын айтып,  Түріксой мен университет арасындағы ынтымақтастықтың артатынына сенетінін білдірді.

Ректор Мұтанов болса студенттердің біліміне қосқан үлестері үшін Қасейінов мырза мен Түріксой ұйымына алғыс айтты.