Түрік баспасөзіне шолу
Газеттер маңызды жаңалықтарға орын берген.
Йени Шафак газеті «Ердоғаннан Ислам әлеміне үндеу» деген хабар жариялаған. Президент Режеп Тайып Ердоған Израильдің Газа секторына жалғасып жатқан шабуылдарына қатысты «Міндеті Құдс ісін қорғау болған Ислам Ынтымақтастық Ұйымының күн өткен сайын асқынған бұл шабуылдарға бей-жай қарауы мүмкін емес. Уақытты босқа өткізбей, басшылық деңгейінде жиналып, ислам әлемінің айқын ұстанымын көрсетуі керек» деді.
Стар газеті «ЕО-дан Түркияға хабарлама» деген хабарға тоқталған. Еуропа Одағы (ЕО) Комиссиясының Көршілік және кеңеюге жауапты мүшесі Оливер Вархели Түркиямен Кеден одағын жаңарту сияқты мәселелерде жақын болашақта қадамдар жасалатынын айтты.
Хүрриет газеті «Түрік авиакомпаниясы 8 айда 57,4 миллион жолаушы тасымалдады» деген тақырып қолданған. Хабарға қарағанда Түрік Әуе жолдарының қаңтар-тамыз кезеңінде жолаушы саны өткен жылдың сәйкес кезеңімен салыстырғанда 2,5 пайыз артып, 57,4 миллионға жетті.
Сабах газеті «Стамбул әуежайы «Еуропаның үздігі» деп аталды» деген хабарға орын берген. Хабарға қарағанда, «Google» қолданушыларының пікірлері бойынша жүргізілген зерттеуге сәйкес Стамбул әуежайы Еуропадағы үздік әуежай болып таңдалды.
Хабер Түрік газеті «Түркияның жарнамалық фильмдері 1 миллиард рет қаралды» деген хабар жариялаған. Мәдениет және туризм министрлігі дайындаған Түркияны насихаттауға арналған фильмдер 200-ден астам елдің телеарналары мен цифрлық платформаларында көрсетілді. Түркияны танытуға бағытталған жарнамалық фильмдер бір ай ішінде 1 миллиард рет қаралды.
