"Орион" капсуласымен қайта байланыс жасалды

Америка Құрама Штаттарының Ұлттық Аэронавтика және Ғарыш басқармасы (НАСА) 16 қарашада «Артемида» миссиясымен ұшырылған "Орион" капсуласымен байланысын қалпына келтіргенін хабарлады.

НАСА ғарыштан Жер шарына мәліметтер жіберу үшін қолданылатын «Терең ғарыштық желі» мен "Орион" капсуласы арасындағы қайта құру процесі кезінде капсуламен байланыс үзілгенін хабарлаған еді.

НАСА 47 минуттық байланыс үзілісінің шешілгенін және сигналдың жоғалу себебінің зерттелетінін хабарлады.

21 қарашада "Орионның" Ай орбитасындағы 128 шақырым жер бетіне ең жақын позициясына жеткені жарияланған болатын.

"Орион" капсуласы Айды шамамен бір апта бойы айналып өтіп, содан кейін Жер шарына оралып, 11 желтоқсанда Тынық мұхитына қонады деп жоспарланған.