«Бизнес әлемінің ең ықпалды 100 адамы»

«Fortune» журналы «Бизнес әлеміндегі ең ықпалды 100 адам» тізімін жариялады. Тізімнің көшбасшысы  «Tesla»-ның Бас директоры Илон Маск болды. Тізімде 40 бизнес саласының 30-дан 90 жасқа дейінгі көшбасшылары бар.

Масктың кең көзқарасы мен инженерлік интуициясы оны көптеген салаларда танымал көшбасшыға айналдырғаны айтылған.

Тізімде Масктың «SpaceX» және «Neuralink» компанияларының табыстары көрсетіліп, Маск саясатқа көбірек араласып, Дональд Трамптың ең көрнекті жақтастарының біріне айналғанына назар аударған.

Екінші орында «Nvidia» компаниясының негізін қалаушы және Бас директоры Дженсен Хуанг бар. Ол өз компаниясын жасанды интеллект саласында ең маңызды компанияға айналдырғаны баса айтылды.

 «Microsoft» корпорациясының Бас директоры Сатья Наделла тізімде үшінші орында. Наделла «Microsoft» корпорациясын 10 жыл ішінде бұлт және жасанды интеллект сияқты екі негізгі түрлендіруден өткізгені және «OpenAI»-ға салынған инвестицияның «Microsoft»-тың технология индустриясының жоғарғы деңгейіне шығуға көмектескені айтылған.

Бұл тізімде төртінші орынды «Berkshire Hathaway» Бас директоры Уоррен Баффет, бесінші орынды АҚШ-тағы ең ірі банктердің бірі «JPMorgan Chase» Бас директоры Джейми Даймон иеленді.

«Apple» Бас директоры Тим Кук алтыншы, "Meta" Бас директоры Марк Цукерберг жетінші, «OpenAI» Бас директоры Сэм Альтман сегізінші, «General Motors» Бас директоры Мэри Барра тоғызыншы, «Alphabet» Бас директоры Сундар Пичай оныншы болды.

 «Chobani» Бас директоры Хамди Улукая тізімде 83-ші орынды иеленді. Улукаяның 1994 жылы Түркиядан АҚШ-қа көшіп келгені және 2005 жылы алған несиеге Нью-Йорктің солтүстігінде йогурт фабрикасын сатып алғаны айтылды.Тізімде Улукаяның бизнес әлеміндегі ең ықпалды филантроптардың бірі екеніне назар аударылып, оның компаниясының босқындарды жұмысқа алуда көшбасшы болғаны атап өтілді.