Ауғанстанда шиіт хазарларға шабуыл

«TOLO News»-тің хабарлауынша, Дайкунди мен Гор провинцияларының шекарасындағы Карюдал аймағында белгісіз қарулы адамдар шиіт хазарларға шабуыл жасаған. Шабуылда кем дегенде 14 адам қаза тауып, 4 адам жараланған.
Шабуылға ұшырағандардың Дайкунди провинциясының Сенги Тахт ауданының тұрғындары екені және олардың Кербалаға барған туыстарымен кездесу үшін Карюдал аймағына барғаны хабарланды.

Қарулы адамдар суретке түсеміз деген желеумен аудан тұрғындары мінген автобусты тоқтатып, артынша оқ жаудырған. Шабуылдың жауапкершілігін ДАИШ террор ұйымы алған. Ауғанстан әкімшілігінен әзірге ешқандай мәлімдеме жасалған жоқ.

Ауғанстанда әртүрлі қарулы топтар, әсіресе ДАИШ террор ұйымы ауған шиіттерін қарулы немесе бомбалы шабуылдармен жиі нысанаға алуда.