Экваторлық Гвинеяда «Марбург» вирусы қаупі артуда

Дүниежүзілік Денсаулық сақтау ұйымының (ДДCҰ) Бас хатшысы Тедрос Адханом Гебрейесус   Экваторлық Гвинеяда барлығы 16 адамда «Марбург» вирусы анықталғанын хабарлады.

Гебрейесус ДДСҰ-ның жаһандық денсаулық мәселелері күн тәртібімен өткен баспасөз мәслихатында мәлімдеме жасады.

Экваторлық Гвинеяда бұл уақытқа дейін «Марбург» вирусының 16 науқаста анықталғанына назар аударған Гебрейесус диагноз қойылғандардың 11-інің қайтыс болғанын білдірді.

Гебрейесус індет басталған 13 ақпан күнінен бері елдегі оқиға санының да 23 болып тіркелгенін, елде ең көп зардап шеккен аймақтың Литораль уәлаятына қарасты Бата қаласы екенін атап өтті.

«ДДСҰ барлық серіктестерді қырағы болуға шақырады, өйткені елде инфекцияның анықталмаған тізбегі болуы мүмкін» деді ол.

ДДСҰ денсаулық сақтау министрлігін вируспен күресуде қолдайтынын айтқан Гебрейесус «Экваторлық Гвинея індетке қарсы әрекет етудің маңызды сәтін бастан кешуде. Бұл індетті тоқтату үшін үкімет пен бүкіл қоғамның күш-жігері қажет» деді.

«Эбола» тектес екені білдірілген «Марбург» вирусы алғаш рет 1967 жылы Германияның «Марбург» қаласындағы зертханада анықталған еді.

Жеміс жарқанаттар арқылы тарайтын «Марбург» вирусы адамдар арасында дене сұйықтығы арқылы немесе жұқтырған адаммен байланыста тарайды. Ауруды жұқтырған адамдарда жоғары температура, қатты бас ауруы, әлсіздік және құсу сияқты белгілер кенеттен пайда болады, ал көптеген науқас 7 күн ішінде ауыр геморрагиялық белгілер көрсетеді.

Вакцинасы немесе арнайы емі болмаған «Марбург» вирусының өлім көрсеткіші 23 пен 90 пайыз арасында өзгереді.