ჰაქან ფიდანმა ევროკავშირის საგარეო საქმეთა მინისტრების შეხვედრის შემდეგ შეფასებები გააკეთა

საგარეო საქმეთა მინისტრმა ჰაქან ფიდანმა ბელგიის დედაქალაქ ბრიუსელში ევროკავშირის საგარეო საქმეთა მინისტრების არაოფიციალურ შეხვედრაში მონაწილეობის შემდეგ შეფასებები გააკეთა.

ფიდანმა განაცხადა, რომ შეხვედრაზე დეტალურად განიხილეს თუ როგორ შეიძლება წინ წავიდეს თურქეთი-ევროკავშირის ურთიერთობები და როგორ ითანამშრომლონ თურქეთმა და ევროკავშირმა გლობალურ და რეგიონულ საკითხებზე.

მან ხაზგასმით აღნიშნა, რომ ტექნიკურ საკითხებზე კონკრეტული ნაბიჯები უნდა გადაიდგას, რათა დაჩქარდეს ურთიერთობები უახლოეს პერიოდში და დაამატა: „პირველ რიგში, 2019 წელს შეჩერებული დიალოგის დადგენილი მექანიზმები ხელახლა უნდა ამოქმედდეს. ჩვენი მოლოდინები საბაჟო კავშირის განახლებაზე გრძელდება“.

ფიდანმა აღნიშნა, რომ ერთ-ერთი პრიორიტეტული საკითხი იყო ვიზალიბერალიზაცია, 66 შესაბამისი კრიტერიუმი დაკმაყოფილებულია და ისინი შესაბამის უწყებებთან ერთად მუშაობენ დარჩენილი 6 კრიტერიუმის შესასრულებლად.

მინისტრმა ფიდანმა თქვა: „ვიზალიბერალიზაციის მიღწევამდე ჩვენ ვაგრძელებთ მუშაობას იმ სირთულეებისა და დაბრკოლებების აღმოსაფხვრელად, რომლებსაც ჩვენი მოქალაქეები აწყდებიან შენგენის სავიზო განაცხადის პროცესში“.

"ჩვენ გვჯერა, რომ თურქეთ-ევროკავშირის ურთიერთობების გამოცოცხლება ყველას ინტერესშია. თუმცა, ჩვენ ხაზგასმით აღვნიშნეთ, რომ კვიპროსის საკითხსა და თურქეთ-ევროკავშირის ურთიერთობებს შორის კავშირის დამყარება არ არის ჯანსაღი მეთოდი და არანაირ შედეგს არ გამოიღებს." - განაცხადა ფიდანმა  და დაამატა, რომ ევროკავშირში გაწევრიანება თურქეთის სტრატეგიული მიზანია.

ფიდანმა ასევე თქვა: "ჩვენ გვინდა პროგრესის მიღწევა პოზიტიურ დღის წესრიგში. თუ ევროკავშირი ანალოგიურად პოზიტიურ მიდგომას გამოიჩენს, ეს იქნება ყველას ინტერესში“.