ერსინ თათარ-ჰაქან ფიდანის ერთობლივი პრესკონფერენცია

ჩრდილოეთ კვიპროსის თურქული რესპუბლიკის (ჩკთრ) პრეზიდენტმა ერსინ თათარმა განაცხადა: „მადლიერები ვართ ჩვენი დედასამშობლოს (თურქეთის) მიმართ“.

პრეზიდენტმა თათარმა ეს განცხადება, საგარეო საქმეთა მინისტრ ჰაქან ფიდანთან ნიქოზიაში გამართული შეხვედრის შემდეგ გამართულ ერთობლივ პრესკონფერენციაზე გააკეთა.

თათარმა ყურადღება გაამახვილა თურქეთის მხრიდან ჩკთრ-სთვის გაწეულ მხარდაჭერაზე ყველა პლატფორმაზე და განაცხადა: „უსამართლო გლობალურ გარემოში, ჩვენ ვიბრძვით კვიპროსელი თურქი ხალხის ფუნდამენტური უფლებების დასამკვიდრებლად და მათი სუვერენული და თანასწორი საერთაშორისო სტატუსის დასადასტურებლად. მადლიერები ვართ ჩვენი დედასამშობლოს მიმართ, რომელიც გვერდში გვიდგას ამ ღირსეულ გზაზე, გვეხმარება ყველა პლატფორმაზე და იყენებს ყველა რესურსს ჩვენი სახელმწიფოს წინსვლისა და დამსახურებული სტატუსის მოსაპოვებლად“.

საგარეო საქმეთა მინისტრმა ჰაქან ფიდანმა კი განაცხადა, რომ ყველა ხედავს, რომ კვიპროსში ორი სახელმწიფოს ფორმატში გადაწყვეტის გარდა სხვა გამოსავალი არ არსებობს. ფიდანმა აღნიშნა: „იზოლაცია, რომელსაც კვიპროსელი თურქები 50 წლის განმავლობაში განიცდიან, ჩუმ დანაშაულად იქცა კაცობრიობის წინააღმდეგ. ამას ჰყავს ჩუმი პარტნიორები. ისინი ამას აკეთებენ შეგნებულად თუ შეუგნებლად. ჩვენ ვაკეთებთ ყველაფერს, რაც შეგვიძლია, რათა კვიპროსის მოსახლეობამ მინიმალურად იგრძნოს ეს მდგომარეობა. ბოლო 50 წლის განმავლობაში კუნძულზე რეალობა შეიქმნა. ყველა ხედავს, რომ საკითხის ორი სახელმწიფოს ფორმატში გადაწყვეტის გარდა, კუნძულზე არსებული მდგომარეობის მოგვარებას სხვა გამოსავალი არ უწერია“.

ფიდანმა აღნიშნა, რომ მთავარი მოწოდება სურს გააკეთოს სამხრეთ კვიპროსის ბერძნული ადმინისტრაციის მოქალაქეებისა და პოლიტიკური ლიდერებისადმი: „თუ მათაც სურთ კვიპროსის კუნძულის წინსვლა თანამედროვე, განვითარებული, მშვიდობიანი გზით და უსაფრთხოების სამუდამოდ უზრუნველყოფა, მათ გამბედაობა უნდა გამოიჩინონ ასეთი გადაწყვეტილებების განხორციელებაში. მე აქედან მოვუწოდებ მათ გამბედაობისკენ“.

ფიდანმა ასევე აღნიშნა, რომ ისინი გააგრძელებენ თანამშრომლობის გაღრმავებას ჩრდილოეთ კვიპროსთან ყველა სფეროში და სურთ, რომ საბერძნეთსა და თურქეთს შორის არსებული დადებითი პოლიტიკური ატმოსფერო კუნძულზეც აისახოს.

„შესაძლებელია საბერძნეთმა, თურქეთმა, ჩრდილოეთ კვიპროსის თურქულმა რესპუბლიკამ და სამხრეთ კვიპროსის ბერძნულმა ადმინისტრაციამ ერთად ააშენონ უკეთესი მომავალი ჩვენს რეგიონში“, განაცხადა თურქეთის საგარეო საქმეთა მინისტრმა.