ისრაელმა სირიაზე საჰაერო იერიში მიიტანა

გავრცელებული ინფორმაციით, ისრაელის მიერ სირიის დედაქალაქ დამასკოზე ღამის საათებში განხორციელებული საჰაერო თავდასხმების შედეგად მრავალი ადამიანი დაიღუპა.

სირიის საინფორმაციო სააგენტო SANA-ს მიერ გავრცელებულ ინფორმაციაში ნათქვამია: „ჩვენი საჰაერო თავდაცვის სისტემები ამ ღამით მესამედ დაუპირისპირდა მტრულ სამიზნეებს“.

SANA-ს მიერ სამხედრო წყაროზე დაყრდნობით გავრცელებულ სხვა ინფორმაციაში ნათქვამია, რომ ისრაელმა ადგილობრივი დროით 02:05 საათზე დედაქალაქზე თავდასხმები განახორციელა საბრძოლო თვითმფრინავებითა და დრონებით.

ინფორმაციაში აღნიშნულია: „ჩვენმა საჰაერო თავდაცვის სისტემებმა მოიგერიეს რაკეტები და დრონები და უმეტესობა ჩამოაგდეს. თავდასხმის შედეგად 3 სამოქალაქო პირი დაიღუპა, 9 დაშავდა, მიყენებულია მატერიალური ზარალი“.

ამასთან, რეჟიმის მედიამ გაავრცელა ინფორმაცია, რომ თავდასხმის დროს დაიღუპა სირიის სახელმწიფო ტელევიზიის ერთ-ერთი წამყვანი, საფა აჰმედი.

ისრაელის მხრიდან თავდასხმასთან დაკავშირებით ჯერ-ჯერობით განცხადება არ გაკეთებულა.

ცნობისათვის, 2011 წელს დაწყებული სამოქალაქო ომის შემდეგ ისრაელი დროდადრო ახორციელებს თავდასხმებს სირიაში ირანის მიერ მხარდაჭერილი დაჯგუფებების და სირიის არმიის სამხედრო ობიექტებზე.