ვენესუელაში დემონსტრაციებზე 25 ადამიანი დაიღუპა

ვენესუელის ეროვნულმა პროკურორმა ტარეკ უილიამ სააბმა განაცხადა, რომ საპრეზიდენტო არჩევნების შემდეგ დაწყებულ ძალადობას 25 ადამიანი, მათ შორის 2 ჯარისკაცი ემსხვერპლა.

სააბმა, რომელმაც პრესკონფერენცია გამართა დედაქალაქ კარაკასში, განაცხადა, რომ ძალადობრივი ინციდენტების დროს დაკავებულებს კავშირი ჰქონდათ ნარკომოვაჭრეებთან და რომ გამოძიება გრძელდება.

იგი შეეხო დემონსტრაციების დროს დაღუპულთა საკითხს და თქვა: „29 და 30 ივლისს 25 ადამიანი, მათ შორის 2 ჯარისკაცი, დაიღუპა. ჩვენ მიერ ჩატარებული გამოძიების შედეგად, შეგვიძლია ვთქვათ, რომ ამაზე პასუხისმგებელი არიან „კომანდიტოების“ სახელწოდების კრიმინალური ჯგუფები. ჩვენ გვაქვს სატელეფონო ზარების ჩანაწერები და ბევრი ვიდეო კადრი“.

სააბის თქმით, დაკავებულთა სასამართლო პროცესი გრძელდება და დაამატა: "ვენესუელა ჯერ არნახული გამოწვევის წინაშე დგას. ისინი ცდილობდნენ ფერადი რევოლუციის მოწყობას. გავიხსენოთ სიტუაცია უკრაინაში, რომელიც დაფინანსებული იყო ამერიკის შეერთებული შტატების მიერ, იგივე უნდათ აქ განახორციელონ და მოუწოდებენ ლეგიტიმურად არჩეული მთავრობის დამხობისკენ“.

შეგახსენებთ, რომ ვენესუელაში საპრეზიდენტო არჩევნები 28 ივლისს გაიმართა და ვენესუელის საარჩევნო საბჭოს მიერ გამოცხადებული შედეგების მიხედვით, ნიკოლას მადურომ საპრეზიდენტო არჩევნებში მესამედ გაიმარჯვა ხმების 51,20 პროცენტით.

29 ივლისს არჩევნების დასრულების შემდეგ ოპოზიციამ განცხადება გააკეთა და აღნიშნა, რომ ეროვნული საარჩევნო საბჭოს მონაცემები არ იყო ზუსტი და შედეგები გაყალბებული იყო.