რუსეთი მზადაა უკრაინასთან მოლაპარაკებების "არსებული რეალობის შესაბამისად" წარმართვისთვის

რუსეთმა გამოაცხადა მზადყოფნა უკრაინასთან მოლაპარაკებების "არსებული რეალობის შესაბამისად" წარმართვისთვის.

საგარეო საქმეთა სამინისტროს პრესსპიკერმა, მარია ზახაროვამ, დედაქალაქ მოსკოვში ონლაინ გამართულ ყოველკვირეულ პრესკონფერენციაზე დღის წესრიგში არსებულ საკითხებზე განცხადებები გააკეთა.

გერმანიის განცხადებების შეფასებისას, რომ „რუსეთი არ არის მზად უკრაინასთან მოლაპარაკებებისთვის“, მარია ზახაროვამ თქვა, რომ მათი პოზიციები ამ საკითხთან დაკავშირებით უცვლელია და დაამატა: "ჩვენ არასოდეს გვითქვამს უარი მოლაპარაკებებზე. რა თქმა უნდა, მზად ვართ მოლაპარაკებები წარვმართოთ იმ რეალობის გათვალისწინებით, რომელიც ახლა ჩანს."

მან აღნიშნა, რომ გერმანია აგრძელებს იარაღის მიწოდებას უკრაინისთვის და დაამატა: „გერმანული მხარე, ნაცვლად იმისა, რომ გამოიყენოს თავისი გავლენა კიევის ხელისუფლებაზე, აგრძელებს კიევისთვის იარაღის სხვადასხვა სისტემების მიწოდებას საკუთარი კანონების საწინააღმდეგოდ, რომლებიც კრძალავს იარაღის ექსპორტს კრიზისულ და კონფლიქტურ ზონებში“.

რუსმა პრესსპიკერმა ასევე შეაფასა აშშ-ს განცხადებები, რომ "ჩრდილოეთ კორეამ რუსეთს იარაღი გაუგზავნა უკრაინაში გამოსაყენებლად" და თქვა: "ამ ბრალდებების მკაფიო დასაბუთება წარმოდგენილ არ არის და არ შეიძლება იყოს წარმოდგენილი. რადგან ამერიკის წარმომადგენლების მიერ გაკეთებული განცხადებები ტყუილია."

ზახაროვა ამტკიცებდა, რომ „აშშ ქმნის საბაბს ჩრდილოეთ კორეისთვის სანქციების დასაწესებლად“.

შეგახსენებთ, რომ რუსმა სამხედროებმა უკრაინაზე თავდასხმა 24 თებერვალს დაიწყეს.