ჩრდილოეთ კორეამ კორეის ნახევარკუნძულის აღმოსავლეთ სანაპიროზე ბალისტიკური რაკეტა გაუშვა

ჩრდილოეთ კორეამ კორეის ნახევარკუნძულის აღმოსავლეთ სანაპიროზე ბალისტიკური რაკეტა გაუშვა.

Yonhap News-ის ცნობით, სამხრეთ კორეის გენერალურმა შტაბმა წერილობითი განცხადება გააკეთა ჩრდილოეთის მიერ რაკეტის გაშვების შესახებ.

განცხადებაში აღნიშნულია, რომ ჩრდილოეთ კორეამ კორეის ნახევარკუნძულის აღმოსავლეთ სანაპიროზე „ამოუცნობი” ბალისტიკური რაკეტა გაუშვა.

იაპონიის არმიამ კი დაადასტურა ჩრდილოეთის მხრიდან სროლა და განაცხადა, რომ ბალისტიკური რაკეტა იაპონიის ექსკლუზიური ეკონომიკური ზონის გარეთ ჩამოვარდა.

ცნობილია, რომ კორეის ნახევარკუნძულზე სამხედრო წვრთნებითა და სარაკეტო გამოცდებით დაძაბულობის ესკალაცია გრძელდება და აღსანიშნავია, რომ ჩრდილოეთ კორეის მიერ რაკეტის ეს გაშვება ამერიკის შეერთებულ შტატებში დღევანდელი 60-ე საპრეზიდენტო არჩევნების დროს მოხდა.