თურქეთში ვიზიტორთა რაოდენობა რეკორდულად გაიზარდა

თურქეთი გახდა მსოფლიოში რიგით მე-6 ქვეყანა, რომელსაც 2019 წელში ყველაზე მეტი ვიზიტორი ეწვია. მსოფლიო ტურიზმის ორგანიზაციის (UNWTO) მონაცემებით, განისაზღვრა ის ქვეყნები, რომლებმაც გასულ წელს ყველაზე მეტ ტურისტს უმასპინძლეს. შესაბამისად, გასულ წელს თურქეთში ჩამოსულ უცხოელთა რაოდენობა, 2018 წელთან შედარებით 14%-ით გაიზარდა და მთლიანობაში 52.5 მილიონს მიაღწია და ამით მან მსოფლიოში მე-6 ადგილზე გადაინაცვლა. პირველ ადგილზე 90 მილიონზე მეტი ვიზიტორით საფრანგეთია, მას  83.8 მილიონით ესპანეთი მოჰყვება, აშშ-ი 78,7 მილიონი ვიზიტორით მესამე ადგილზეა, მეოთხეზე  67,5 მილიონით ჩინეთია და მეხუთეზე კი 64,6 მილიონით იტალიაა. პირველ ათეულში შევიდნენ ასევე მექსიკა, ტაილანდი, გერმანია და დიდი ბრიტანეთი.