Türkiyə ehtiyat taburunun Kosovoya keçidi tamamlanıb

 NATO-nun Kosovodakı sülhməramlı qüvvəsi (KFOR): Türk ehtiyat taburu Kosovoya çatdı. KFOR-un yazılı açıqlamasında ehtiyat birliyinin dəyişiklik planı çərçivəsində təyin olunan Türkiyə ehtiyat taburunun Kosovoya keçidinin tamamlandığı və bölgədə daha əvvəl yerləşdirilmiş İtaliya birliyinin yerini alacağı bildirilib. 

Açıqlamada 65-ci Mexanikləşdirilmiş Piyada Briqadası Komandirliyinə bağlı təxminən 350 nəfərlik şəxsi heyətin KFOR birlikləri ilə müxtəlif fəaliyyətlər həyata keçirəcəyi və təhlükəsizlik vəziyyətindəki dəyişikliklərə cavab olaraq vəzifələndiriləcəyi qeyd edilib. 

KFOR-un uzun müddətdir davam edən Birləşmiş Millətlər Təşkilatının səlahiyyətinə uyğun olaraq potensial gərginlik risklərinin qarşısını almaq və istənilən təhlükəsizlik ssenarisi ilə mübarizə aparmaq üçün yaxşı hazırlıqlı vəziyyətdə olduğu vurğulanıb. Təhlükəsizlik və sabitliyi təmin etmək məqsədilə Birləşmiş Millətlər Təşkilatı Təhlükəsizlik Şurasının qərarına əsasən 12 iyun 1999-cu ildə Kosovoda fəaliyyətə başlayan bu qüvvələrdə NATO-ya üzv və ya olmayan 29 ölkədən təxminən 4500 hərbi personal xidmət edir. 

Türk əsgərləri 1999-cu ildən bəri bu çərçivəsində Kosovoda xidmət göstərir. KFOR son dövrlərdə ölkənin şimalında baş verən gərginliklər fonunda bölgədəki varlığını və patrul fəaliyyətlərini artırmışdır.