“Trampdan əvvəlki hökumətin səhv siyasətlərini tərk etməsini gözləyirik”, R.T.Ərdoğan

Rəcəb Tayyib Ərdoğan Amerika Birləşmiş Ştatlarında prezident seçkilərində qalib gələn Donald Trampın əvvəlki hökumətin səhv siyasətlərini tərk etməsini gözlədiyini bildirib. O, İstanbulda keçirilən 6-cı Beynəlxalq Qadın və Ədalət Sammitində çıxış edib.

Ərdoğan İsrail tərəfindən son 13 ayda Qəzzada qətlə yetirilən 50 mindən çox günahsız insanın üçdə ikisinin qadın və uşaqlardan ibarət olduğunu vurğulayıb: “Bombalar altında övladlarını, ailələrini, vətənlərini və dəyərlərini qoruyan Fələstinin cəsur qadınları ümmətin iftixar simvoluna çevrilir. Qəzzada və Livanda qətliamlar sona çatana, atəşkəs və sülh təmin olunana qədər bacı və qardaşlarımıza dəstək verməyi davam etdirəcəyik.”

Türkiye prezidenti R.T.Ərdoğan: “Dəyərli dostum Trampdan ikinci prezidentlik dönəmində əvvəlki hökumətin səhv siyasətlərini tərk etməsini gözləyirik. Hörmətli prezidentin müharibələri dayandırmaq üçün məsuliyyətli addımlar atacağına ürəkdən inanır, bunu səmimi şəkildə arzulayırıq.”