Prezident Ərdoğanın Macarıstana səfəri başa çatıb

Prezident Rəcəb Tayyib Ərdoğan Macarıstana səfəri çərçivəsində 2024-cü il Türkiye-Macarıstan Mədəniyyət İli Açılış Proqramında iştirak edib.

Budapeşt MÜPA Bela Bartok Milli Konsert Salonunda Macarıstan Prezidenti Katalin Novak və Baş nazir Viktor Orbanın iştirakı ilə keçirilən proqramda macar və türk musiqiləri səsləndirilib.

Dövlət başçısı tədbirdən sonra Budapeşt Liszt Ferenc Beynəlxalq Hava Limanına gedib və burada təmaslarını tamamlayıb.

Prezident Ərdoğanı və müşayiətindəki heyəti Macarıstanın Xarici İşlər və Xarici Ticarət naziri Peter Szijjarto, Macarıstanın Ankaradakı səfiri Viktor Matis, Macarıstan Xarici İşlər Nazirliyinin Protokol Baş direktoru Anett Varga, Türkiyenin Budapeştdəki səfiri Gülşen Karanis Ekşioğlu və həyat yoldaşı Əkrəm Ekşioğlu yola salıblar.

Qeyd edək ki, Ərdoğanın Macarıstana səfəri çərçivəsində bu ölkənin prezidenti Novak ilə görüşündə Türkiye-Macarıstan ikitərəfli əlaqələri, qlobal və regional problemlər, İsrailin Qəzzaya hücumları ilə bağlı inkişaflar müzakirə edilib.

Türkiye Prezidenti Administrasiyasının Kommunikasiya İdarəsinin  sosial media hesabından verilən məlumata görə, görüş zamanı Prezident Ərdoğan Türkiyenin bütün münaqişə bölgələrində əmin-amanlığın təmin edilməsi üçün qlobal sülhə xidmət səylərinin davam etdiyini bildirib.

Regional və qlobal sülh, insan haqları və beynəlxalq hüququn qorunması üçün İsrailin Fələstin torpaqlarına hücumlarına son qoyulmalı olduğuna diqqət çəkən Ərdoğan Türkiye-Macarıstan münasibətlərinə də toxunub.

Ərdoğan Budapeştə səfərindən sonra Türkiye ilə Macarıstan arasında əlaqələrin daha da dərinləşəcəyinə inandığını vurğulayıb.

Görüşdə qlobal və regional məsələlər də müzakirə olunub.

Prezident Ərdoğan macar həmkarı Katalin Novak ilə Şandor sarayında görüşdükdən sonra Karmelita monastırına gedib. Ərdoğan onu burada qarşılayan Baş nazir Orbana yerli və milli istehsal olan “Togg” markalı avtomobil hədiyyə edib.

Baş nazir Orban da Prezident Ərdoğana macar atı hədiyyə edib. Ərdoğan və Orban mətbuata qapalı keçən ikitərəfli görüşdən sonra heyətlər arasında keçirilən görüşə sədrlik edib.
Görüşlərdən sonra iki ölkə arasında müxtəlif sahələrdə sazişlər imzalanıb.