Hulusi Akar: "Suriyanın suverenliyinə və ərazi bütövlüyünə hörmətlə yanaşırıq"

“Terror bəlasından yaxın zamanda qurtulmaq, ölkəmizin, sərhədlərimizin, vətəndaşlarımızın təhlükəsizliyini təmin etmək və regiona sülh, sabitlik gətirmək üçün səy göstəririk”.

Bunu milli müdafiə naziri Hulusi Akar dünən Moskvada Rusiya, İran və Suriyadan olan həmkarları ilə keçirdiyi dördtərəfli müzakirədən sonra jurnalistlərə açıqlamasında deyib.

Dördtərəfli görüşdə müxtəlif mövzularda fikir mübadiləsi apardıqlarını bildirən Akar deyib:

“Hər zaman ifadə etdiyimiz kimi, Suriyanın suverenliyinə və ərazi bütövlüyünə hörmətlə yanaşırıq, Suriyada olmağımızın yeganə səbəbi terrorçularla, xüsusilə terror təşkilatı PKK/YPG/PYD və DEAŞ ilə mübarizə aparmaqdır və terrorçuları zərərsizləşdirmək üçün davamlı olaraq çalışırıq. Bunun təkcə bizim üçün deyil, Suriyanın bütövlüyü üçün də vacib olduğunu vurğuladıq”. 

H.Akar bildirib ki, iclas zamanı suriyalı qaçqınların təhlükəsiz şəkildə ölkələrinə qayıtmaları məsələsi də müzakirə olunub: “Həmçinin müxtəlif ikitərəfli görüş imkanlarım da oldu. Bu müzakirələr səmərəli və məhsuldar keçdi. Razılaşdıq ki, regionda sülh və sabitlik üçün təmaslara ehtiyac var. Biz suriyalı qardaşlarımız üçün problem yaradacaq qərar qəbul etmərik. Bu, müzakirə mövzusu deyil. Hər kəs bunu bilməli və buna uyğun davranmalıdır. Lap əvvəldən bəri bizim bu məsələdəki mövqeyimiz konkretdir”.

Dördtərəfli görüş çərçivəsində müxtəlif ikitərəfli görüşlər keçirmə fürsəti əldə etdiklərini də qeyd edən Akar “Bu görüşlər və müzakirələr səmərəli və müsbət oldu” deyib.