Azərbaycanın böyük zəfəri
Dr. Telman Nusrətoğlunun mövzuya dair dəyərləndirməsini təqdim edirik.
9 Noyabrda Rusiya Federasiyasının prezidenti V. Putin, AzƏrbaycan Prezidenti İ. Əliyev və Ermənistan Baş Naziri N. Paşinyan Qarabağda tam atəşkəs elan olunması barədə birgə bəyanat imzalamışdır. Əldə edilən razılaşmanın əsas müddəalarına görə Azərbaycan Ordusu işğaldan azad etdiyi rayonlardakı mövqelərini qorumaqla birlikdə qısa müddət ərzində Kəlbəcər, Laçın və Ağdam rayonları da Ermənilər tərəfindən boşaldılaraq Azərbaycana təhvil verilməli, bölgəyə 1960 nəfərlik, beş il müddətinə Rusiya sülhməramlı qüvvələri yerləşdirilməli, Naxçıvanla Azərbaycanın digər bölgələri arasındakı əlaqəni təmin edəcək nəqliyyat dəhlizi yaradılmalıdır. Müqavilənin Cənubi Qafqazın gələcəyində hansı proseslərə zəmin hazırlayacağı, Azərbaycanın millli maraqları baxımından müsbət və mənfi xarakterizə edə biləcəyimiz müddəaları üzərində ayrıca təhlil aparmağa çalışacağıq. Lakin hərb meydanında baş verən dəyişikliklər, bu müqavilənin imzalanmasını zəruri edən kritik döyüşlərin gedişatını da bir daha xatırlamaqda fayda vardır.
Qarabağın tarixi paytaxtı, Türk İslam mədəniyyətinin mühüm mərkəzlərindən olan Şuşanın Azərbaycan Ordusunun böyük şücaəti, əzmi sayəsində işğaldan azad edilməsindən sonra əksər hərbi ekspertlər Ermənistanın ağ bayraq qaldırmasının an məsələsi olduğunu ifadə etməyə başlamışdılar. Azərabaycan Ordusu tərəfindən bütün cəbhə boyu müvəffəqiyyətli hücum strategiyası həyata keçirilmiş, sadəcə bir gün içərisində Ali Baş Komandan İlham Əliyev tərəfindən daha 71 kəndin, 1 qəsəbə və çox sayıda strateji yüksəkliyin işğaldan azad edildiyi xalqa elan edilmişdi. Erməni tərəfinin də etiraf etdiyi kimi Azərbaycan ordusu sürətlə Xankəndi istiqamətinə tərəf irəliləyərək separatçı rejimin sözdə paytaxtına yaxınlaşmışdı. Təsadüfü deyil ki, işğalçı rejimin başçısı Araik Arutunyan Yerevanda Erməni xalqına müraciət edərkən Şuşanın azad edildiyi 7 noyabr tarixindən başlayan günləri həyatının ən ağır günləri adlandırmış, Füzuli, Cəbrayıl, Zəngilan, Qubadlı, Hadrut rayonları, Xocavənd və Əsgəranın böyük bölümü və nəhayət Şuşanın Azərbaycan Ordusunun kontrolu altına keçməsindən sonra döyüşlərin Xankəndinin ətrafında cərəyan etdiyini bildirərək ya bir iki gün içərisində bütün Qarabağın itirilməsi reallığıyla barışmaq ya da Azərbaycan dövlətinin bütün şərtlərini qəbul edib təslimçi atəşkəs anlaşmasına razı olmaq Əsı qarşısında qaldıqlarını etiraf etmişdir. Müharibə başlayandan cəbhədəki fəlakətli vəziyyəti xalqından gizlədən, mütəmadi olaraq yalan məlumatlar verən Paşinyanın da istefasını tələb edən qəzəbli xalq kütlələri və müxalifət qarşısında dili açılmağa başlamış, ordusunun Azərbaycan qarşısında tükəndiyini, son günlər ciddi miqyasda əsgər və texnika çatışmazlığı yaşadıqlarını, erməni əsgərlər arasında fərariliyin artdığını, müqaviməti davam etdirmənin anlamsız olduğunu, Bakının ağır şərtlərini qəbul etməkdən başqa çıxış yollarının olmadığını etiraf etməyə başlamışdır.
Erməni tərəfinin də açıqlamalarından göründüyü kimi Ermənistan ərazisində Rusiya təyyarəsinin vurulması sonrasında Moskvanın sürətlə proseslərə müdaxilə etməsiylə başlayan atəşkəs bir-iki gün geciksəydi hərb tarixinə keçəcək uğurlu hərbi əməliyyatlarla Dağlıq Qarabağın geri qalan Xankəndi, Xocavənd kimi rayonları da işğaldan azad ediləcəkdi. Yenə də Azərbaycanın cəbhəsindən təhlil etdiyimizdə atəşkəs haqqında birgə bəyanat ən başda Ermənistanın məğlubiyyəti və Azərbaycanın qələbəsinin etirafıdır. Lakin tarixi – hüquqi həqiqətlərin Azərbaycanın tərəfində olması bir yana, güc və imkanlar paradiqmasında bu mübarizəni bir proses olaraq da görmək, geopolitik mənada rəsmin bütününə baxmaq və təmkinlə diplomatik masada da tam qələbəni əldə etmək lazım. Artıq Türkiyə-Azərbaycan ittifaqı Cənubi Qafqazın yüksələn gücüdür. Genişləndirilmiş ikitərəfli yeni hərbi sazişlərlə bu durumu qalıcı hala gətirmək, ehtimal olunan təhdidləri bərtaraf etmək də mühümdür.
Tarixi təcrübə etibariylə Azərbaycan xalqı nəzdində ciddi narahatlığa da səbəb olan sülhməramlı Rusiya qoşununun Qarabağa yerləşdirilməsi məsələsinə gəlincə hazırkı regional güc balansını, Rusya amilini və tədricilik metodologiyasıyla möhkəmlənmənin daha doğru olacağını da nəzərə almalıyıq. Azərbaycan Ordusunun dosta, düşmənə gücünü göstərdiy , böyük zəfərə imza ataraq Xankəndinin qapılarına dayandığı danılmaz həqiqətdir. Prezident İ. Əliyev liderliyində Azərbaycan dövlət ağlının tək millət ortaq güc fəlsəfəsiylə Türkiyəylə intensiv məsləhətləşmə içində bu qutlu və mürəkkəb savaşı mütləq qələbəylə nəticələndirmək üçün çalışdığı görülməlidir.
Ankaradan gələn nazirlər heyətini qəbulunda Azərbaycan dövlət başçısının bu, bizim müştərək qələbəmiz, Türkiyə-Azərbaycan birliyinin də təsdiqidir yönündəki bəyanı, yeni regional işbirliyi formatı olaraq Türkiyə-Rusiya birgə atəşkəsə nəzarət mərkəzinin yaradılmasının önəminə toxunması vacib məqamlardır. Yuxarıda da vurğuladığımız kimi bu bir prosesdir və Ermənistandakı xəmir də daha çox su aparacaq. Erməni siyasətçiləri təkidlə belə bir anlaşmaya imza atan Paşinyanın istefasını istəməkdədir. Azərbaycanla Türkiyənin hərbi əməkdaşlıq səviyyəsini, Rusya- Türkiyə dialoqunu, sülhməramlıların fəaliyəti və atəşkəs rejimini birgə izləyəcək qərargahın da Türk və Rus zabitlərindən formalaşdırılacağını diqqətə alaraq bir dəfə daha Türkiyəsiz Cənubi Qafqazda heç bir razlıaşmanın olmayacağını ifadə edə bilərik.
Bu regionda sülh və əməkdaşlıq atmosferinin hakim olması üçün də Azərbaycanın ərazi bütövlüyü təmin edilməli, həqiqi mənada Rus-Türk strateji razılaşmasının təməlləri atılmalı, Naxçıvanla Azərbaycanın digər regionları, Türkiyə ilə Türküstan arasında quru bağlantısı təmin edilməlidir. Zənnimcə birgə bəyanat maddələri arasına Naxçıvana nəqliyyat dəhlizinin yaradılmasının da əlavə edilməsi Azərbaycan və Türkiyənin ən önəmli siyasi nailiyətlərindən biridir. Kəlbəcər, Laçın kimi dağlıq relyefə sahib çətin döyüş əməliyyatlarının aparılacağı rayonların tək qurşun atmadan Azərbaycana təhvil verilməsi başqa bir uğurdur. Müsəlman Türk əhali Xankəndi, Xocalı, Xocavənd kimi ərazilərimizə də qayıda biləcək, bütün Erməni silahlıları Qarabağı tərk etmək məcburiyyətində qalacaqdır. Birgə bəyanatda Dağlıq Qarabağ Ermənilərinə veriləcək hər hansı status da nəzərdə tutulmamışdır. Prezident İ. Əliyevin də bəyanlarından göründüyü kimi siyasi-inzibati muxtariyyət yerinə mədəni muxtariyyət tərcih ediləcəkdir. Ermənistan sülh şəraitində birgə yaşayış yerinə yenə Türk Müsəlman əhaliyə düşmən siyasəti yeritməyi seçəcəksə yenə bunun bədəlini daha ağır şəkildə ödəməyə də davam edəcəkdir. Bəli, Rus sülhməramlılarının Qarabağa yerləşdirilməsiylə bağlı durum Azərbaycanın milli maraqlarına cavab vermir, amma onların sayı məhdud, müddəti beş illikdir. Pandemiya sonrasında yeni dünya nizamı şəkillənirkən Qafqazda Azərbaycanla əməkdaşlığın əvəz edilməzliyi, Rusiyanın Türkiyə ilə əlaqələrini genişlətməyə olan ehtiyacı, Türk zabitlərinin sülhü qoruma mərkəzindəki iştirakı Rusiyanın yaranan yeni şəraitdə qismi neytrallığını qoruyaraq Qarabağın tamamında Azərbaycan hakimiyyətinin təsis edilməsinə mane olmayacağını göstərir.
Әlaqәli Xәbәrlәr
Türkiyə neft hasilatında rekorda imza atılıb
Türkiyə tarixində ilk dəfə neft hasilatında rekorda imza atılıb.
Bir saat 60 dəqiqədir, çünki … (mətin və audio)
Nə üçün bir saat 20 və ya 100 deyil, 60 dəqiqədir? Niyə bir sutkada 24 saat var?